Jambyl oblysy ákimi Berdibek Saparbaev Qazirgi tańda Baizaq aýdanyndaǵy jaǵdai tolyqtai baqylaýǵa alynǵanyn málimdedi, - dep habarlaidy "Ult aqparat".
Bul týraly ákim Facebook jelisinde jazdy.
"Qazirgi tańda Baizaq aýdanyndaǵy jaǵdai tolyqtai baqylaýǵa alyndy. Óńirdiń tótenshe jaǵdailar, quqyq qorǵaý jáne meditsina salasynyń ókilderi barynsha jumyldyryldy. Apat bolǵan aýmaqtan evakýatsiialanǵan turǵyndarǵa arnalyp, oblys ortalyǵynan 400-den astam jatyn oryn daiyndalǵan. Qosymsha 1000-ǵa jýyq oryn daiyndaý múmkindigi qarastyrylǵan", - delingen ákimniń jazbasynda.
Jarylys zardaptaryn joiý jáne evakýatsiialanǵan turǵyndardy kerek-jaraqpen, ystyq tamaqpen qamtamasyz etý boiynsha jumystar júrgizilip jatqany aitylady.
"Meniń basshylyǵymmen qurylǵan jedel shtab barlyq qajetti sharalardy atqaryp jatyr. Zardap shekkender Taraz qalalyq jáne aýdandyq aýrýhanalarǵa jetkizilip, meditsinalyq kómekter kórsetilip jatyr. QR Qorǵanys jáne Tótenshe jaǵdailar ministrlerimen birlesip, tiisti sheshimder qabyldanýda. Barshańyzdy tek qana resmi málimetterge senýge, jalǵan aqparattardy taratpaýǵa shaqyramyn", - dedi ákim.
Eske salaiyq, Jambyl oblysy Baizaq aýdanynda ornalasqan áskeri bólimde saǵat 19.00 shamasynda qoimalardyń biriniń janynda órt shyqqan. Órt saldarynan anyqtalmaǵan zattar jarylǵan. Jaqyn mańdaǵy turǵyndar evakýatsiialanǵany anyqtaldy.
