Belgili arheolog Zeinolla Samashev «Táýelsiz Qazaqstan: Jasampazdyqqa toly jyldar. Shyǵys Qazaqstan oblysynyń basty jetistikteri» atty dóńgelek ústelde arheologiia salasynyń jetistikterine toqtaldy, dep habarlaidy QazAqparat.
«Qazaq halqynyń tarihy tereńde jatyr. Ókinishke qarai, elimiz egemendik alǵanǵa deiin ózimizdiń ótkenimizdi zerttei almai keldik. Al táýelsizdik tarihymyzdy túgendeýge jol ashty. 2015 jyly oblys ákimi Danial Ahmetovtiń qoldaýymen ár túrli ǵylymi ortalyqtarda jumys istep jatqan ǵalymdar Shyǵys Qazaqstanǵa shaqyrtylǵan. Arheologiiany damytýdyń 5 jylǵa arnalǵan óńirlik baǵdarlamasy ázirlenip, qazba jumystary qolǵa alyndy. Sonyń nátijesinde, 6 jyl ishinde álem nazaryn burǵan aýqymdy ǵylymi jańalyqtar ashyldy. Tarbaǵatai aýdanynda tonalmaǵan ekinshi Altyn adam tabyldy», - deidi ol.
Zeinolla Samashevtyń sózinshe, Nur-Sultan men Almaty qalalarynan bilikti mamandar da tartylǵan. Qazba jumystary aldaǵy ýaqytta da jalǵasyn tabatyn bolady.
«Mundaǵy maqsat – ǵylymi jańalyq ashý ǵana emes, jańa aitqanymdai osy ýaqytqa deiin durys jazylmaǵan elimizdiń kóne tarihyn jańǵyrtý. Sondai-aq biyldan bastap «Shyǵys Qazaqstannyń orta ǵasyrdaǵy tarihynyń ocherkteri jáne kóne eskertkishteri» atty taqyrypta ǵylymi jinaq ázirleýge kiristik. Bul jumysqa sheteldik ǵalymdar da atsalysyp jatyr. Kelesi jyly jinaqtyń birinshi nusqasy jaryqqa shyǵady dep josparlanǵan», - deidi arheolog.
Onyń aitýynsha, ejelgi saq qorymdarynan tabylǵan 300 altyn artefakt osy jyldyń qyrkúiek aiynda alǵash ret Ulybritaniianyń Kembridj qalasynda ornalasqan Fitsýiliam mýzeiine qoiylmaq.
