QR Aqparat jáne qoǵamdyq damý ministrligi Azamattyq qoǵam isteri komitetiniń tóraǵasy Madiiar Qojahmet volonterlerdi yntalandyrý sharalary týraly aitty, dep habarlaidy QazAqparat.
«Kún tártibine volonterlerdi yntalandyrý máselesi qoiyldy. Osy maqsatta zań shyǵarý jumysy júrgizilýde, onda joǵary oqý oryndaryna, arnaiy-orta bilim berý mekemelerine túsý jáne azamattyq qyzmetke kirý kezinde basymdyq alý bóliginde volonterlerdiń quqyqtaryn keńeitý usynylyp otyr. Sonymen qatar, zeinetke shyǵar kezde volonterlik qyzmet ótilin esepke alý, memlekettik múlikti alýǵa jeńildikter usyný máselesi qarastyrylýda», - dedi Madiiar Qojahmet Ortalyq kommýnikatsiialar qyzmetinde ótken baspasóz máslihatynda.
Sonymen birge, Volonter jyly aiasynda alǵash ret «Jyl volonteri» halyqaralyq syilyǵy taǵaiyndalǵan. Ótken jyly ony Qazaqstan, Resei, Qyrǵyzstannan kelgen 48 belsendi volonter alǵan.
«Volonterlik boiynsha tolyq aqparat QazVolunteer.kz biryńǵai platformasynda bar. Volonterlikpen ainalysqysy kelgen azamattar tirkele alady, óitkeni kóptegen sharalar sol platformada kórsetilgen, uiymdasqan toppen jumys isteýge de múmkindikter bar. Qazirgi ýaqytta 47 myńdai azamat pen 3 myńdai uiym osy platformaǵa tirkelip, óz sharalary týraly habarlamalardy jariialaidy», - dep tolyqtyrdy Madiiar Qojahmet.
