Sáýir aiynan bastap zeinetaqy men áleýmettik tólemder qosymsha 4 paiyzǵa artady. Jalpy zeinetaqynyń ortasha mólsheri ótken jylmen salystyrǵanda 11 paiyzǵa ósedi, dep habarlaidy QazAqparat.
Bul sharalar búgin qabyldanǵan «2022–2024 jyldarǵa arnalǵan respýblikalyq biýdjet týraly» Zańǵa ózgerister men tolyqtyrýlar engizý týraly» Zańda qarastyrylǵan.
«Biz búgin 2022 jylǵa arnalǵan respýblikalyq biýdjetti naqtyladyq. Qazirgi tańda áleýmettik-ekonomikalyq ahýaldyń kúrdeli ekenin kórip otyrmyz. Álem koronavirýs indetinen keiin áli tolyq qalpyna kelgen joq. Osy tusta sanktsiialyq teketires pen geosaiasi ahýaldyń shielenisýi jaǵdaidy odan ári ýshyqtyryp jiberdi dep aitýǵa tolyq negiz bar. «Qasiretti qańtar» oqiǵasy da elimiz úshin aýyr synaq boldy. Qazir álem boiynsha ekonomikalyq ósimniń tómendeýi boljanyp otyr. Shikizat baǵasy ósti, sonymen birge infliatsiia da arta tústi. Logistikaǵa qatysty probelmalar da ózekti bolyp tur. Munyń bári Qazaqstannyń ekonomikasyna, respýblikalyq biýdjetke aitarlyqtai zardabyn tigizýde. Osyǵan orai, memleket eklonomikamyzdy qorǵaýǵa qajetti sharalardy qabyldady», - dedi Senat tóraǵasy Máýlen Áshimbaev búgingi otyrysynda.
Onyń aitýynsha, búgin biýdjetke engizilgen túzetýler Prezidenttiń tiisti tapsyrmalaryn oryndaýǵa baǵyttalyp otyr. Prezident reformalarynyń basty maqsaty – ekonomika ósimine ulttyq bailyqtyń ádil bólinýine jáne qazaqstandyqtardyń ómir súrý sapasyn arttyrýǵa qajetti jaǵdai qalyptastyrý.
«Qazir memleketimiz kúrdeli ekonomikalyq jaǵdaiǵa qaramastan, óziniń áleýmettik mindettemelerin tolyǵymen oryndap otyr. Shamamen biylǵy biýdjettiń jartysy áleýmettik salaǵa jumsalady. Búgin qabyldanǵan túzetýlerdiń nátijesinde sáýir aiynan bastap zeinetaqy men áleýmettik tólemder qosymsha 4 paiyzǵa indeksteledi, iaǵni artady. Mundai qadam 4 millionnan astam adamǵa igi áserin tigizedi. Jalpy alǵanda, zeinetaqynyń ortasha mólsheri ótken jylmen salystyrǵanda 11 paiyzǵa ósedi.
Halyqtyń tabysyn arttyrý baǵdarlamasy boiynsha Keshendi jospardy iske asyrý úshin 197 mlrd teńge bólinedi. Azyq-túlik qaýipsizdigin qamtamasyz etý josparyn iske asyrýǵa 238 mlrd teńge qarastyryldy. Ekonomikanyń naqty sektoryn qarjylandyrý kólemi de ulǵaiady.
«Osy sharalardyń bári ekonomikamyzdy damytýǵa, jańa jumys oryndaryn ashýǵa jáne halyqtyń ál- aýqatyn arttyrýǵa jol ashady dep senemiz», - dedi Máýlen Áshimbaev.
