QR Prezident Ákimshiligi basshysynyń orynbasary Timýr Súleimenov 5 paiyzdyq qosymsha zeinetaqy salymynyń 2023 jylǵa deiin shegerilýi týraly pikir bildirdi, dep habarlaidy QazAqparat.
«Jasyrary joq, qazirgi zeinetaqy júiesi biraz qiyndyqtardy bastan ótkerýde. Halyq jasy ulǵaiyp, ómir súrý uzaqtyǵy artyp keledi. Turaqsyzdyq, mindetti zeinetaqy jarnalaryn tolyq aýdarmaý saldarynan 2014 jyly qosymsha 5% engizý qajet boldy. 2020 jyldyń 1 qańtaryna deiin bes jyl ótpeli kezeń berildi (...) Demografiialyq, ekonomikalyq jáne qoǵamymyzdaǵy ózge de ózgerister barlyǵyn qaita qaraýdy talap etedi. Qazir Úkimet te, Ulttyq bank te zeinetaqy júiesin túbegeili basqa arnaǵa burý qajettigi týraly aitýǵa daiyn emes. Úkimet pen Ulttyq bankke sarapshylardy tartý týraly tapsyrma berildi», - dedi Timýr Súleimenov «Habar 24» arnasyndaǵy tikelei efirde bergen suhbatynda.
Sonymen birge, spiker áleýmettik maqsatta jumsalatyn biýdjet shyǵyndary týraly áńgimeledi.
«Qasym-Jomart Toqaev Konstitýtsiia boiynsha áleýmettik memleket ekenimizdi basa aitty. Sondyqtan, Úkimet pen memlekettik organdar biýdjet pen memlekettik baǵdarlamalardy ázirleýde osyǵan súienedi. Ózińiz bilesiz, biýdjet jobasy Parlamentke engizilgen jáne jaqyn arada talqylanady», - dedi T. Súleimenov.
Eske sala ketsek, Qasym-Jomart Toqaev Qazaqstan halqyna Joldaýynda Úkimetke 5 paiyzdyq qosymsha zeinetaqy salymdaryn 2023 jylǵa deiin shegere turýdy tapsyrdy. Osy ýaqyt ishinde Úkimet, biznes ókilderi men sarapshylar nusqalardy qarap, bolashaq zeinetkerlerdiń de, jumys berýshilerdiń múddesi saqtalǵan, ortaq kelisilgen sheshimge kelýi kerek.
