Foto: Ashyq derekkózden
2024 jyldyń 1 qańtarynan bastap jumys berýshiler tarapynan qosymsha zeinetaqy jarnalary engizileldi. Bul týraly búgin Úkimet otyrysynda QR Eńbek jáne halyqty áleýmettik qorǵaý ministri Tamara Dúisenova aitty, dep habarlaidy QazAqparat.
«Qazirgi qoldanystaǵy júie zeinetkerlerdiń úsh býynyn qamtidy. Qarastyrylǵan ózgeristerde 1998 jylǵa deiin jáne 1998 jyldan keiin zeinetke shyqqan azamattar zeinetaqy tólemderiniń negizgi bóligin memleketten, al bolashaq zeinetkerler Jinaqtaýshy zeinetaqy júiesinen alatyn bolady. Osy maqsatta búgingi zeinetkerler úshin bazalyq jáne eńbek zeinetaqylarynyń mólsherin esepteý parametrleri ózgeredi. Bul ózgeris atalǵan zeinetaqylardyń mólsherin kóbeitý maqsatynda qarastyrylyp otyr. Al bolashaq zeinetkerler úshin 2024 jyldyń 1 qańtarynan bastap jumys berýshiler tarapynyn qosymsha zeinetaqy jarnalary engiziletin bolady», - dedi ministr.
Sonymen qatar ol jańa Áleýmettik kodekste salymshylardyń óz aktivterin basqarý jónindegi quqyqtaryn keńeitý boiynsha ózgerister engizilgenin atap ótti.
«Endi azamattar belgilengen jetkiliktik sheginen asqan zeinetaqy jinaqtaryn tek emdelýge jáne turǵyn úi satyp alýǵa jumsai alady. Sondai-aq salymshylarǵa zeinetaqy jinaqtarynyń 50 paiyzdan aspaityn bóligin aktivterdi basqarý kompaniiasyna berý jáne mundai kompaniiany ózderi tańdaý quqyǵy beriledi. Bul rette memleket zeinetaqy jinaqtarynyń saqtalýyna kepildikti jinaqtyń Ulttyq bank basqaratyn bóligine ǵana beretinin atap ótken jón», - dedi Tamara Dúisenova.
Al jeke basqarýǵa beriletin zeinetaqy jinaqtarynyń saqtalýyna jáne onyń tabystylyǵyna salymshy tańdap alǵan kompaniia jaýapty bolady. Sondyqtan árbir salymshy basqarý jónindegi jeke kompaniiany tańdaǵan kezde yqtimal táýekelderdi muqiiat eskerýi tiis bolady.
