Memlekettik annýitet kompaniiasynyń basqarýshy direktory Álemjan Aqajanov zeinetkerlik annýitet sharttarynyń qalai ózgeretinin aityp berdi, – dep habarlaidy Sputnik Qazaqstan.
Zeinetkerlik annýitetti alǵannan keiin jumys isteitin adamdar zeinetaqy qoryna taǵy aqsha jinaidy. Sóitip, 63 jasta zeinetaqy qorynan da, annýitet kompaniiasynan da tólemderdi alyp otyrady.
"Zeinetkerlik annýitet" qalai beriledi?
Qazirgi zańnamaǵa sáikes, zeinetaqy qoryndaǵy aqshany ai saiynǵy tólem retinde merziminen buryn alýǵa bolady. Ol úshin esepshotta jinaqtyń naqty bir mólsherin jinaý qajet. Onyń kólemi jyl saiyn ekonomikalyq kórsetkishterge qarai ózgerip turady. Máselen, biyl er adamdar úshin qajetti somanyń mólsheri 10 809 889 teńge bolsa, áielder úshin 14 485 100 teńgeni quraidy. Oǵan qosa, naqty jas ereksheligi de belgilengen. 2020 jyldan bastap er adamdar 55 jasta, al áielder 51,5 jasta (jyl saiyn jarty jyldan qosylady - Sputnik Qazaqstan) qajetti somany jinap, zeinetkerlik annýitet shartymen ai saiynǵy tólemdi erte ala alady.
"Ol úshin zeinetkerlik annýitet týraly kelisim jasalady. Salymshynyń esepshotyndaǵy aqsha ómirdi saqtandyrý kompaniiasyna aýdarylady da, keste boiynsha ai saiyn zeinetaqy tólemderi berile bastaidy. Máselen, biz adamnyń zeinetaqy jinaqtaryn 110 jasqa deiin josparlap qoiamyz. Zeinetkerlik annýitet arqyly zeinet jasqa jetpei, tiisti tólemderdi ai saiyn alýǵa bolady. Talap boiynsha bir tólemniń mólsheri minimaldy zeinetaqydan kem bolmaýy tiis. Árine, jinaqtyń somasy kóp bolsa, ai saiynǵy tólem de kóbeie túsedi ", - deidi Aqajanov.
Resmi málimetke sáikes, Qazaqstanda zeinetkerlik annýitet kelisimshartyn 60 myń adam rásimdegen.
Annýitet sharttary qalai ózgeredi?
Búginde zeinetkerlik annýitetti barynsha qoljetimdi etý úshin qosymsha sharalar qolǵa alynyp otyr. Aldaǵy ýaqytta osy qyzmettiń taǵy eki túrin engizý josparlanǵan. Birinshisi "birlesken annýitet" bolsa, ekinshisi - "keiinge qaldyrylǵan annýitet". Qazirgi kezde osy jobalar boiynsha arnaiy jumys toby quryldy.
"Mysaly, "birlesken annýitet" erli-zaiyptylarǵa arnalǵan. Eger bireýinde zeinetaqy jinaqtary jetkilikti, al ekinshisinde jetkiliksiz bolsa, birlesken annýitetti alýǵa ruqsat beriledi. Osylaisha, erli-zaiyptylardyń zeinetaqy jinaqtaryn qosyp, bireýiniń aqshasyn ekinshisine quiýǵa bolady. Sóitip, jetpei turǵan somany tolyqtyrýǵa múmkindik bar. Sonyń nátijesinde ekeýi de zeinetaqy tólemderin erte alady", - deidi Aqajanov.
Al "keiinge qaldyrylǵan annýitet" boiynsha qazirgi jas ereksheligine qatysty talapqa qaramastan, zeinetkerlik annýitet kelisimshartyn jasaýǵa múmkindik beriledi. Biraq esepshotta qajetti soma bolýy shart.
"Máselen, adam 45 jasynda qajetti somany jinasa, zeinetkerlik annýitetke qujat tapsyra alady. Sonyń arqasynda kepildendirilgen tabys stavkasyn belgilep, aldaǵy tólemderdiń indeksatsiiasyn qamtamasyz ete alady. Al artyq aqshany investitsiialaýǵa múmkindik bar. Sonda qosymsha tabys túsedi. Menińshe, aldaǵy bir-eki jylda osy qyzmetter iske qosylady", - dep atap kórsetti Aqajanov.
Mamannyń sózine qaraǵanda, zeinetkerlik annýitetti alǵannan keiin jumys isteitin adamdar zeinetaqy qoryna taǵy aqsha jinaidy. Sóitip, 63 jasta zeinetaqy qorynan da, annýitet kompaniiasynan da tólemderdi alyp otyrady. Oǵan qosa, bazalyq zeinetaqy alatyndar bar.
