Birjolǵy zeinetaqy tóleminiń arqasynda 147 747 adam ipoteka kómeginsiz-aq úi satyp alǵan, dep habarlaidy QazAqparat.
Biryńǵai zeinetaqy jinaqtaýshy qorynyń baspasóz qyzmeti osyndai málimet taratty.
«Qazaqstandyqtar enpf-otbasy.kz platformasy arqyly turǵyn úi men emdelý aqysyn tóleýge 1,5 trillion teńge zeinetaqy jinaǵyn paidalandy. Birjolǵy zeinetaqy tólemderiniń kómegimen turǵyn úi jaǵdaiyn 279 859 qazaqstandyq jaqsartyp úlgerdi. Onyń ishinde 147 747 adam zeinetaqy tólemderin ipotekasyz turǵyn úi satyp alýǵa jumsaǵan. Bul maqsatqa jalpy kólemi 1 trillion teńgeden astam qarajat ketken. Taǵy 44 100 qazaqstandyq «Otbasy bankindegi» («Báiterek» holdinginiń enshiles uiymy) zaem boiynsha qaryzdaryn óteýge 118 mlrd teńge jaratqan. 31 myń adam ózge ekinshi deńgeili bankterde 117 mlrd teńgege ipotekalyq qaryzyn tólegen. Al 17 myńǵa jýyq azamat zeinetaqy tólemderin Otbasy bankinen nesie alý úshin alǵashqy jarna túrinde jumsaǵan», - dep jazylǵan resmi málimette.
Onyń 84% ekinshi naryqtan baspana alsa, 16% bastapqy jarnany qurylys salýshylarǵa tólep, jańa úiden baspana alýdy jón kórgen.
Taǵy 29 793 qazaqstandyq jalpy kólemi 30 mlrd teńge zeinetaqy jinaǵyn emdelý maqsatyna jumsaǵan.
Birjolǵy zeinetaqy tólemin qoldanǵan qazaqstandyqtardyń ortasha jasy - 41, deni - er azamattar (68%).
Nur-Sultan qalasy, Mańǵystaý oblysy men Almaty qalasy zeinetaqy tólemderin baspana alý úshin eń kóp qoldanǵan aimaqtardyń alǵashqy úshtiginde tur.
Al Soltústik Qazaqstan oblysynyń turǵyndary biryńǵai zeinetaqy tólemin paidalanýǵa eń tómen qyzyǵýshylyq tanytqan.
«Qazaqstandyqtard týystaryna kómektesýge asyq jáne bul múmkindikti belsendi túrde paidalanýda. Oǵan bizdiń statistika kýá. Osylaisha, 279 859 adamnyń 35%-y jinaqtaryn jartylai nemese tolyǵymen týystarynan alyp, ózderiniń turǵyn úi jaǵdailaryn jaqsartty. Tipti týysqandardyń az ǵana zeinetaqy jinaqtarynyń ózi otbasy ishinde biriktirilgende, turǵyn úi satyp alýǵa nemese qoljetimdi sharttarmen nesie alý úshin bastapqy jarna tóleýge múmkindik berdi» - deidi «Otbasy banktiń» basqarma tóraiymy, Lázzat Ibragimova.
