بٸرجولعى زەينەتاقى تٶلەمٸنٸڭ ارقاسىندا 147 747 ادام يپوتەكا كٶمەگٸنسٸز-اق ٷي ساتىپ العان, دەپ حابارلايدى قازاقپارات.
بٸرىڭعاي زەينەتاقى جيناقتاۋشى قورىنىڭ باسپاسٶز قىزمەتٸ وسىنداي مەلٸمەت تاراتتى.
«قازاقستاندىقتار enpf-otbasy.kz پلاتفورماسى ارقىلى تۇرعىن ٷي مەن ەمدەلۋ اقىسىن تٶلەۋگە 1,5 تريلليون تەڭگە زەينەتاقى جيناعىن پايدالاندى. بٸرجولعى زەينەتاقى تٶلەمدەرٸنٸڭ كٶمەگٸمەن تۇرعىن ٷي جاعدايىن 279 859 قازاقستاندىق جاقسارتىپ ٷلگەردٸ. ونىڭ ٸشٸندە 147 747 ادام زەينەتاقى تٶلەمدەرٸن يپوتەكاسىز تۇرعىن ٷي ساتىپ الۋعا جۇمساعان. بۇل ماقساتقا جالپى كٶلەمٸ 1 تريلليون تەڭگەدەن استام قاراجات كەتكەن. تاعى 44 100 قازاقستاندىق «وتباسى بانكٸندەگٸ» («بەيتەرەك» حولدينگٸنٸڭ ەنشٸلەس ۇيىمى) زاەم بويىنشا قارىزدارىن ٶتەۋگە 118 ملرد تەڭگە جاراتقان. 31 مىڭ ادام ٶزگە ەكٸنشٸ دەڭگەيلٸ بانكتەردە 117 ملرد تەڭگەگە يپوتەكالىق قارىزىن تٶلەگەن. ال 17 مىڭعا جۋىق ازامات زەينەتاقى تٶلەمدەرٸن وتباسى بانكٸنەن نەسيە الۋ ٷشٸن العاشقى جارنا تٷرٸندە جۇمساعان», - دەپ جازىلعان رەسمي مەلٸمەتتە.
ونىڭ 84% ەكٸنشٸ نارىقتان باسپانا السا, 16% باستاپقى جارنانى قۇرىلىس سالۋشىلارعا تٶلەپ, جاڭا ٷيدەن باسپانا الۋدى جٶن كٶرگەن.
تاعى 29 793 قازاقستاندىق جالپى كٶلەمٸ 30 ملرد تەڭگە زەينەتاقى جيناعىن ەمدەلۋ ماقساتىنا جۇمساعان.
بٸرجولعى زەينەتاقى تٶلەمٸن قولدانعان قازاقستاندىقتاردىڭ ورتاشا جاسى - 41, دەنٸ - ەر ازاماتتار (68%).
نۇر-سۇلتان قالاسى, ماڭعىستاۋ وبلىسى مەن الماتى قالاسى زەينەتاقى تٶلەمدەرٸن باسپانا الۋ ٷشٸن ەڭ كٶپ قولدانعان ايماقتاردىڭ العاشقى ٷشتٸگٸندە تۇر.
ال سولتٷستٸك قازاقستان وبلىسىنىڭ تۇرعىندارى بٸرىڭعاي زەينەتاقى تٶلەمٸن پايدالانۋعا ەڭ تٶمەن قىزىعۋشىلىق تانىتقان.
«قازاقستاندىقتارد تۋىستارىنا كٶمەكتەسۋگە اسىق جەنە بۇل مٷمكٸندٸكتٸ بەلسەندٸ تٷردە پايدالانۋدا. وعان بٸزدٸڭ ستاتيستيكا كۋە. وسىلايشا, 279 859 ادامنىڭ 35%-ى جيناقتارىن جارتىلاي نەمەسە تولىعىمەن تۋىستارىنان الىپ, ٶزدەرٸنٸڭ تۇرعىن ٷي جاعدايلارىن جاقسارتتى. تٸپتٸ تۋىسقانداردىڭ از عانا زەينەتاقى جيناقتارىنىڭ ٶزٸ وتباسى ٸشٸندە بٸرٸكتٸرٸلگەندە, تۇرعىن ٷي ساتىپ الۋعا نەمەسە قولجەتٸمدٸ شارتتارمەن نەسيە الۋ ٷشٸن باستاپقى جارنا تٶلەۋگە مٷمكٸندٸك بەردٸ» - دەيدٸ «وتباسى بانكتٸڭ» باسقارما تٶرايىمى, لەززات يبراگيموۆا.
