QR Básekelestikti qorǵaý jáne damytý agenttigi birjolǵy zeinetaqy tólemin turǵyn úi jaǵdaiyn jasqartý úshin paidalaný tártibinen ákimshilik kedergiler tapqan, dep habarlaidy "Ult aqparat".
Agenttiktiń bergen málimeti boiynsha, qoldanystaǵy tártip birjolǵy zeinetaqy tólemderin «Báiterek» ulttyq basqarýshy holdinginiń biryńǵai operatorynyń kepildigi bar kompaniialardyń ǵana úlestik qurylysyna salýǵa ruqsat etedi. Al ekinshi deńgeidegi bank qarjylandyratyn jobaǵa zeinetaqy jarnalaryn paidalaný múmkin emes.
«Turǵyn úi qurylysyn «Turǵyn úi qurylysyna úlestik qatysý týraly» QR Zańynda kózdelgen usynylatyn úsh tásildiń biri boiynsha júrgizýge bolady: 1) biryńǵai operatordyń kepildigin alý; 2) Ekinshi deńgeidegi banktiń jobasyna qatysý; 3) kóppáterli turǵyn úidiń qańqasy turǵyzylǵannan keiin úleskerlerdiń aqshasyn tartý», - dep túsindiredi agenttik mamandary.
Básekelestikti qorǵaý jáne damytý agenttigi bul kedergini joiý úshin Indýstriia jáne infraqurylymdyq damý ministrligine naqty usynys berip otyr.
«Qazaqstan Respýblikasynyń zańnamasy boiynsha turǵyn úi jaǵdailaryn jaqsartý úshin birjolǵy zeinetaqy tólemderin paidalaný qaǵidalarynyń besinshi jáne 14-tarmaǵy arqyly ekinshi deńgeidegi bankterge birjolǵy zeinetaqy tólemderin paidalana otyryp, turǵyn úidiń úlestik qurylysy baǵdarlamasyna qatysýǵa múmkindik beretin túzetý engizý qajet», - delingen agenttiktiń aqparatynda.
Bul problema 26 naýryzda Qostanai oblysynda ótken talqylaýda kóterilgen eken. Qazir agenttik usynǵan túzetýdi Indýstriia jáne infraqurylymdyq damý ministrligi pysyqtap jatyr. Quzyrly organnyń talaby boiynsha anyqtalǵan ákimshilik kedergi 2021 jyldyń jeltoqsanyna deiin joiylýy kerek.
