Bastapqy turǵyn úidiń basym bóligi zeinetaqy jinaqtaryn alýshylar úshin qoljetimsiz. Bul týraly Májilis depýtattarynyń resmi saýalyna orai QR Básekelestikti qorǵaý jáne damytý agenttiginiń tóraǵasy Serik Jumanǵarinniń jaýabynda aitylǵan, dep habarlaidy "Ult aqparat".
«Statistika derekteri boiynsha 2019 jyly qurylys jumystarynyń kólemi 4,4 trln teńgeni, onyń ishinde turǵyn úi qurylysynyń kólemi 881 mlrd teńgeni qurady. Sonymen birge, turǵyn úi qurylysyna úlestik qatysýshylarǵa joǵary talaptarǵa bailanysty turǵyn úidiń negizgi kólemi «Turǵyn úi qurylysyna úlestik qatysý týraly» Zańnyń qoldanystaǵy talaptarynan tys satylady. Aitalyq, «Turǵyn úi qurylysyna kepildik berý qory» AQ-nyń derekteri boiynsha respýblika boiynsha 20 qurylys salýshy ǵana (NurSultan - 6, Almaty - 8, Shymkent - 1, Qaraǵandy - 1, Aqtaý - 1, Atyraý - 2, Aqtóbe qalalary - 1) 262 mlrd teńge somasyna nemese jalpy kólemniń 1/3-inen az nysandardyń shekti sanyn salýǵa kepildigi bar», - dedi ol.
Onyń atap ótýinshe, qurylys salýshylardyń derekteri boiynsha, atalǵan turǵyn úi kólemi is júzinde iske asyryldy. Turǵyn úidiń qalǵan kólemi belgilengen qaǵidalardan tys - brondaý, investitsiialaý, rezervteý jáne ózge de sharttar arqyly satylady.
«Osynyń saldarynan, bastapqy turǵyn úidiń aitarlyqtai bóligi zeinetaqy jinaqtaryn alýshylar úshin qoljetimsiz. Sebebi olardy maqsatty paidalaný zańnamaǵa sáikes jasalǵan turǵyn úi qurylysyna úlestik qatysý sharttarymen ǵana rastalady. Osyny eskere otyryp, turǵyn úi qurylysy naryǵynda básekelestikti damytý úshin Ulttyq joba aiasynda taýar naryǵyna kirýdiń negizgi kedergisi retinde turǵyn úi qurylysyna úlestik qatysýyshylarǵa qoiylatyn talaptardy azaitý máselesi pysyqtalyp jatyr», - dedi Serik Jumanǵarin.
