Azamattarǵa zeinetaqy qorlarynda jinaqtalǵan qarajattaryna páter satyp alýǵa múmkindik berý jaqsy bastama. Mundai pikirdi saiasattanýshy Erlan Sairov bildirdi, dep habarlaidy QazAqparat.
«Elimizde áleýmettik máseleler óte kóp. Ony jasyrýdyń da jóni joq. Qazaq: «Aýrýyn jasyrǵan óledi» deidi. Sol kóptegen kúrmeýi kóp áleýmettik máselelerdi sheshýdiń belgili bir retseptileri Joldaýda aityldy. Negizi ol retseptiler jetkilikti. Mysaly, zeinetaqy jinaqtaryn aitsaq bolady. Onyń belgili bir bóligin páter alýǵa nemese balalaryn oqytýǵa jumsaý máselesi. Bul óte jaqsy bastama», - dedi Erlan Sairov Memleket basshysy Qasym-Jomart Toqaevtyń Qazaqstan halqyna Joldaýyna orai pikir bildire kele.
Degenmen, ol zeinetaqy jinaqtaryn páter satyp alýǵa nemese balalaryn oqytýǵa alý máselesin áli de bolsa qoǵammen birge talqylaý qajettigin basa aitty.
Esterińizge sala ketsek, Qasym-Jomart Toqaev Úkimetke azamattardyń zeinetaqy jinaqtaryn baspana alýǵa jumsaýyn retteýdi tapsyrǵan edi.
«Úkimetke jyl sońyna deiin jumystaǵy azamattardyń zeinetaqy jinaqtaryn maqsatty paidalaný máselesin pysyqtaýdy tapsyramyn. Mysaly, baspana satyp alý úshin nemese bilim alý úshin. Shyǵyndardy azaityp, aktivterdi investitsiialyq basqarýdyń sapasyn jaqsartý úshin Úkimetke biýdjettik júieni shoǵyrlandyrý máselesin zerdeleý, áleýmettik qamtamasyz etýde biryńǵai áleýmettik qor men biryńǵai áleýmettik tólem engizý júkteledi», - degen edi Qazaqstan Prezidenti.
