25 aqpannan bastap Qazaqstanda birjolǵy zeinetaqy jinaǵyn emdelýge paidalaný úshin ótinim qabyldaý bastaldy.
Ótinimdi enpf-otbasy.kz saitynda berýge bolady.
Birjolǵy zeinetaqy jinaǵyn kelesi meditsinalyq qyzmetterge paidalanýǵa bolady:
- dárilik qamtamasyz etýdi qosa alǵanda, orfandyq syrqattardy emdeý. Sondai-aq emdeý taktikasyn anyqtaý úshin diagnostikalyq zertteý;
- Qazaqstan Repsýblikasynyń aýmaǵynda ornalasqan meditsina mekemeleri kórsetetin stomatologiialyq qyzmetter (tisti protezdeý, implantatsiia);
- operatsiiadan keiingi tyrtyqtar men týa bitken aqaýlardy, sondai-aq mastektomiiadan keiin túzetý maqsatynda rekonstrýktivti jáne qalpyna keltirý operatsiialary (plastikalyq);
- radionýklidtik jáne radioiodterapiia;
- radiohirýrgiialyq emdeý;
- proton terapiiasy;
- oftalmologiialyq qyzmetter.
25 aqpan kúni emdelýge beriletin birjolǵy zeinetaqy tólemderin alýǵa ótinish berýge arnalǵan portal iske qosylatyny buǵan deiin habarlanǵan bolatyn. QR Densaýlyq saqtaý ministrligi meditsinalyq qyzmetterdiń tizimin 15 aqpanda bekitti. Biraq qoǵam talqysynan keiin zeinetaqy jinaǵyn qoldanýǵa bolatyn qyzmetter túri tolyqtyrylýy múmkin ekendigi aityldy.
Eske salsaq, 2 qańtarda QR Prezidenti Qasym-Jomart Toqaev zeinetaqy jinaǵynyń bir bóligin maqsatty paidalanýǵa qatysty zańǵa qol qoidy.
