QR Eńbek jáne halyqty áleýmettik qorǵaý ministri Birjan Nurymbetov zeinetaqy qoryndaǵy qarajatty qazaqstandyqtardyń baspana men bilim alý maqsatynda jumsaý jospary qashan ázir bolatynyn aityp berdi, dep habarlaidy QazAqparat.
Búgin QR Eńbek jáne halyqty áleýmettik qorǵaý ministrliginde elordanyń jekelegen kásiporyndaryndaǵy eńbek qatynastarynyń problemalyq máselelerine arnalǵan keńes otyrysy ótti.
«Qazirgi ýaqytta biryńǵai zeinetaqy jinaqtaý qorynda 10 trln teńge kóleminde qarajat bar. Bul degenimiz shamamen 9 mln 900 myń adamnyń zeinetaqy qory. Orta eseppen alsaq, bul jinaqtalǵan soma adam basyna shaqqanda 1 mln teńgeden keledi. Sondyqtan da Prezidenttiń Joldaýynda aitylǵan zeinetaqy qoryndaǵy jinaqtalǵan qarjyny qazaqstandyqtardyń baspana men bilim alýǵa jumsaý máselesin biz búginde Ulttyq bankpen birlesip qarastyryp jatyrmyz. Árine, bul keń talqydan ótýi qajet. Sebebi zeinetaqy qoryndaǵy qarajat bolashaqtyń aqshasy, iaǵni zeinetkerlikke shyqqanda beriletin tólemaqy. Jyl sońyna deiin onyń qalai júzege asyrylatyny týraly jospardy ázirleitin bolamyz», - dedi Birjan Nurymbetov keńes otyrysynan soń jýrnalisterdiń suraǵyna jaýap bere otyryp.
Eske sala ketsek, Memleket basshysy Qasym-Jomart Toqaev 2 qyrkúiektegi óz Jodaýynda azamattar zeinetaqy jinaǵyn baspana men bilim alýǵa jumsai alýy kerektigin aitqan. Jáne Úkimetke azamattardyń zeinetaqy jinaqtaryn maqsatty paidalaný máselesin pysyqtaýdy tapsyrdy.
