Zeinetaqy jinaqtarynyń bir jolǵy tólemin alý úshin BJZQ-ǵa alǵashqy kúni 10 myńnan astam ótinim tústi, dep habarlaidy "Ult aqparat" Biryńǵai jinaqtaýshy zeinetaqy qorynyń baspasóz qyzmetine silteme jasap.
«25 qańtarda «Otbasy bankinen BJZQ-ǵa jalpy somasy 114,6 mlrd teńgeden astam somaǵa 10 292 ótinim kelip tústi. Barlyq ótinimdi qor sol kúni-aq, esh kidirissiz qarady.
8 460 ótinim (82% nemese jalpy somasy 49,2 mlrdteńge) tekserýden sátti ótti. Zańnamaǵa sáikes «BJZQ» AQ-ǵa ótinim kelip túsken kúnnen bastap 5 jumys kúninen keshiktirilmei, salymshylardyń «Otbasy banki» AQ arnaiy shotyna shamamen 49,2 mlrd teńge aýdarylady. Aýdarymnyń ortasha somasy – 5,8 mln teńge», delingen habarlamada.
Qor 1 832 (nemese18%) ótinimdi zańnama talaptaryna sáikes kelmeitindikten tómendegi negizgi sebepter boiynsha qabyldamady:
1. Somalar qate, iaǵni shottaǵy zeinetaqy jinaqtarynyń kóleminen asyra kórsetilgen. Sondyqtan ótinimderdi «Otbasy banki» usynymdaryn basshylyqqa ala otyryp, muqiiat toltyrý kerek.
2. Jeke tabys salyǵyn (JTS) tóleý tásilin tańdaý kezinde alýǵa suranys jasalatyn somalar durys kórsetilmegen.
Salyq zańnamasy boiynsha mindetti zeinetaqy jarnalaryna qorǵa aýdarylǵan kezinde JTS salynbaidy, sondyqtan zeinetaqy tólemderine salyq salynýy tiis. Salymshy birjolǵy zeinetaqy tólemin alǵan kezde JTS tóleýdiń eki tásilin tańdaýǵa quqyly. Birinshi tásil - keiinge qaldyrý, ekinshi tásil - birjolǵy zeinetaqy tólemi kezinde salyqty tolyq kólemde birden tóleý. Salymshynyń sheshimi ýákiletti operatorǵa beriletin ótinimde kórsetilýi tiis.
Eger ótinish berýshi JTS tóleýdi keiinge qaldyrý týraly sheshim qabyldasa, onda ol ótinimde suratylatyn somany JTS-ty shegermesten kórsetýi tiis. Eger ótinish berýshi JTS-ty tolyq kólemde birden tóleýdi uiǵarsa, onda ol ótinimde alýǵa bolatyn somany 10% mólsherindegi JTS-ty shegere otyryp kórsetýge tiis.
Qordyń beretin úzindi kóshirmesinde salymshyǵa yńǵaily jáne óz betinshe tańdaý jasaý úshin eki soma da kórsetilgen. Salymshy kórsetetin, alýǵa bolatyn soma zeinetaqy qorynan onyń ýákiletti operatorda ashylǵan arnaiy shotyna túsedi.
3. Ótinimde alýǵa suranys jasalatyn soma eń az jetkiliktilik shegin esepke almastan kórsetiledi. Salymshylar ótiniminde alýǵa bolatyn jáne úzindi kóshirmede kórsetilgen soma sheginde emes, jeke zeinetaqy shotyndaǵy zeinetaqy jinaqtarynyń barlyq somasyn kórsetken.
4. Ótinimderde valiýta baǵamdarynyń qubylmalylyǵy jáne zeinetaqy aktivteriniń investitsiialyq portfelindegi qarjy quraldary qunynyń ózgerýi nátijesinde investitsiialyq tabystyń naryqtyq aýytqýyna bailanysty ózgeristerdi eskermeitin ózekti emes somalar kórsetilgen.
5. «BJZQ» AQ derekter bazasynda jeke zeinetaqy shottary jáne tiisinshe zeinetaqy jinaqtary joq tulǵalardan da ótinim túsken.
6. Salymshylar birin-biri qaitalaityn ótinim de bergen.
Qor osy jáitterdi eskere otyryp, azamattarǵa ózderiniń zeinetaqy jinaqtary týraly ózekti aqparatty, onyń ishinde qoljetimdi soma týraly málimetterdi enpf.kz saityndaǵy jeke kabinetten nemese Biryńǵai jinaqtaýshy zeinetaqy qorynyń mobildik qosymshasy arqyly birjolǵy zeinetaqy tólemderin alýǵa tikelei ótinim berer aldynda muqiiat tekserýge keńes beredi.
Esterińizge sala keteiik, salymshynyń BJZQ-da jetkiliktilik sheginen asatyn somasy bolǵan jaǵdaida, ony paidalanýǵa ótinim sheksiz ret berilýi múmkin. Eger qandai da bir sebeppen salymshyǵa birjolǵy zeinetaqy tólemin alýǵa arnalǵan ótinimdi qanaǵattandyrýdan bas tartylsa, onda bas tartý sebebin joiyp, ýákiletti operatorǵa qaitadan ótinim berýge bolady. Eger salymshy óz jinaqtaryn ártúrli maqsattarǵa paidalanǵysy kelse, onda alýǵa bolatyn soma sheginde osy maqsattarǵa jeke ótinimder berýge bolady.
Sondai-aq, ótinim berýge jáne zeinetaqy jinaqtaryn turǵyn úi jaǵdailaryn jaqsartý jáne (nemese) emdelýge aqy tóleý úshin nysanaly paidalaný sharttaryna bailanysty barlyq máselelerdi ýákiletti operatordyń «bir tereze» qaǵidaty boiynsha qaraitynyn jáne BJZQ-ǵa jeke ótinish berý qajettigi talap etilmeitinin esterińizge salamyz.
