Alty millionnan astam salymshy zeinetaqy qorynda jinalǵan aqshasy týraly málimetti onlain alyp júr, dep habarlaidy "Ult aqparat" qordyń baspasóz qyzmetine silteme jasap.
Zeinetaqy shotynan úzindi kóshirme alý – Biryńǵai jinaqtaýshy zeinetaqy qorynyń salymshylary arasyndaǵy eń tanymal qyzmet. Ótken jyly bul qyzmet 14 millionnan astam márte paidalanylǵan.
«BJZQ salymshylary jeke zeinetaqy shotynan úzindi kóshirmeni shot ashylǵan kúnnen bastap kez kelgen kúni tegin alýǵa quqyly. Bul - zań júzinde bekitilgen quqyq. Búginde salymshylar men alýshylar zeinetaqy jinaǵynyń jai-kúii týraly aqparatty qor keńsesine tikelei kelý, poshta bailanysy, elektrondyq tásilder, BJZQ-ǵa usynylǵan elektrondyq poshta jáne internet bailanysy, elektrondy úkimet portalyndaǵy jeke kabinet arqyly bile alady» delingen habarlamada.
Eń yńǵaily jáne jyldam tásil – úzindi kóshirmeni BJZQ saity nemese elektrondy úkimet portalynyń jeke kabineti arqyly alý. Sonymen qatar BJZQ-nyń smartfon nemese planshetterge arnalǵan jańartylǵan mobildi qosymshasyn paidalanýǵa bolady.
«Búginde 5,6 million adam zeinetaqy jinaǵynyń jai-kúii týraly aqparatty jeke kabinet arqyly alǵan. Bir jyl ishinde internet bailanysy tásilin tańdaǵandar sany 500 myńǵa jýyq adamǵa kóbeidi. 860 myń adam úzindi kóshirmeni elektrondyq poshta arqyly alady. Zeinetaqy jinaǵynyń jai-kúii týraly aqparatty BJZQ filialyna kelip alý - tanymaldyǵy jaǵynan ekinshi orynda. Bul tásildi shamamen eki millionǵa jýyq adam tańdaǵan. BJZQ-dan aqparatty poshta bailanysy arqyly alýshylar sany birtindep azaiýda. Bul jaǵdaida ishine úzindi kóshirme salynǵan hat olarǵa jylyna bir ret jiberiledi. Qazirgi ýaqytta bul tásildi tańdaǵandar sany - 1,3 mln adam. Bul burnaǵy jylmen salystyrǵanda 11,5 paiyzǵa tómen» dep málim etti BJZQ baspasóz qyzmeti.
Aita keteiik, salymshy mekenjaiyn aýystyrǵan jaǵdaida qorǵa habarlaýǵa mindetti. Eger habarlamasa, BJZQ kelesi jyly úzindi kóshirme salynǵan hatty oǵan jibermeýge quqyly.
