QR Qarjy naryǵyn retteý jáne damytý agenttigi Saqtandyrý naryǵy jáne aktýarlyq esep aiyrysýlar departamenti Saqtandyrý naryǵyn damytý basqarmasynyń basshysy Saǵi Ájibek zeinetaqy annýitetine qatysty zańnamaǵa qandai ózgeris engizilgenin aityp berdi, dep habarlaidy QazAqparat.
«Osy jyldyń 2 qańtarynda Memleket basshysy qol qoiǵan «Ekonomikalyq ósimdi qalpyna keltirý týraly» zań arqyly zeinetaqy annýiteti siiaqty saqtandyrý ónimimen qamtamasyz etý erejelerine mańyzdy túzetýler engizildi. Bul túzetýler zeinetaqy annýitetiniń azamattarǵa qoljetimdigin ári tartymdylyǵyn arttyrýǵa áser etti», - dedi S. Ájibek Ortalyq kommýnikatsiialar qyzmetinde ótken brifingte.
Negizgi ózgertýler boiynsha, buryn zeinetaqy annýiteti boiynsha eń tómengi tólem mólsheri minimaldy zeinetaqydan tómen bolmaýy kerek edi. Al qazir tólem mólsheri eń tómengi kúnkóris deńgeiiniń 70% paiyzynan kem bolmaýy kerek. Bul shara arqyly annýitettiń qunyn shamamen 40% paiyzǵa tómendegen.
Ekinshiden tólemderi keiinge qaldyrylǵan zeinetaqy annýiteti engizildi. Bul saqtandyrý ónimi boiynsha azamattar 45 jastan bastap zeinetaqy annýiteti shartyn jasai alady, al tólemderdi er adamdar 55 jastan bastap, áielder – 52 jastan bastap ala bastaidy.
«Biyldan bastap zeinetaqy annýitetiniń quny aitarlyqtai tómendedi. 2020 jyly 55 jasqa tolǵan er adamdar úshin zeinetaqy annýiteti shartyn jasaý úshin jetkilikti soma shamamen 11 million teńge bolsa, biyldan bastap bul kórsetkish 6,7 million teńgege deiin tómendegen. Al 52 jastaǵy áielder úshin jetkilikti soma shamamen 15 mln teńgeden 9,0 mln teńgege tómendegen. Tólemderi 55 jastan bastalatyn keiinge qaldyrylǵan zeinetaqy annýitetin 45 jastan alý úshin er adamda keminde – 6,1 million teńge, al áielde – 7,7 million teńge bolýy kerek. Osylaisha, zeinetaqy annýiteti zeinetaqy qorynyń salymshysyna jas jáne eńbekke qabiletti kezinde zeinetaqy tólemderiniń balamaly kózin qurýǵa jáne zeinetke shyqqanda ózin turaqty tólemdermen qamtamasyz etýge múmkindik beredi», - deidi spiker.
Aita keteiik, Ómirdi saqtandyrý kompaniiasy zeinetaqy annýiteti tólemderin saqtanýshyǵa ómir boiy ai saiyn tóleidi jáne jyl saiyn tólemderdi 5% paiyzdan kem emes kórsetkishke kóterip otyrady. Sonymen birge, zeinetaqy annýiteti shartynda kepildendirilgen tólem merzimin ornatýǵa bolady, bul optsiia saqtanýshy qaitys bolǵan jaǵdaida zeinetaqy annýiteti tólemderin muragerlerge berý múmkindigin qamtamasyz etedi.
