QR Qarjy naryǵyn retteý jáne damytý agenttigi Saqtandyrý naryǵy jáne aktýarlyq esep aiyrysýlar departamenti Saqtandyrý naryǵyn damytý basqarmasynyń basshysy Saǵi Ájibek zeinetaqy annýiteti shartynyń qandai artyqshylyqtar beretinin túsindirdi, dep habarlaidy QazAqparat.
«Ekonomikalyq ósimdi qalpyna keltirý máseleleri jónindegi zań aiasyndaǵy ózgeristerge sáikes, BJZQ salymshylary zeinetaqy annýiteti sharty bolǵan jaǵdaida turǵyn úi jaǵdaiyn jaqsartý jáne (nemese) em aqysyn tóleý nemese zeinetaqy aktivterin investitsiialyq portfel basqarýshysyna senimgerlik basqarýǵa berý úshin BJZQ-ǵa mindetti zeinetaqy jarnalary jáne (nemese) mindetti kásiptik zeinetaqy jarnalary esebinen óz zeinetaqy jinaqtaryn QR zańnamasyna sáikes jumsai alady. Zeinetaqy annýiteti ónimderiniń jelisin keńeitý maqsatynda biyl zeinetaqy annýiteti shartyna bir adamnyń emes, erli-zaiyptylardyń (jaqyn týystardyń) qatysýyna múmkindik beretin birlesken annýitetter engizý josparlanýda», - dedi Saǵi Ájibek OKQ brifinginde.
Birlesken annýitet erli-zaiyptylardyń (jaqyn týystardyń) zeinetaqy jinaqtaryn biriktirýge jáne annýitet sharty boiynsha kiristerdi qaita bólýge múmkindik beredi. Mysaly, bir adamda ÓSK (ómirdi saqtandyrý kompaniiasy) annýitetti satyp alý úshin zeinetaqy jinaqtary jetkiliksiz bolsa, al onyń jubaiynda artyǵymen bolsa, birlesken zeinetaqy annýiteti arqyly ekeýine de ómir boiy tólemder qamtamasyz etiledi.
Sonymen birge, S. Ájibek zeinetaqy annýiteti men zeinetaqy tólemderiniń negizgi aiyrmashylyqtaryn túsindirdi.
«Qoldanystaǵy zańnamaǵa sáikes, azamattar zeinetaqy jasyna jetkende zeinetaqy tólemderin Biryńǵai jinaqtaýshy zeinetaqy qorynan alýǵa quqyly nemese zeinetaqy jinaqtary jetkilikti bolǵan jaǵdaida, ómirdi saqtandyrý kompaniiasynan zeinetaqy annýitetin satyp alý arqyly tólemder ala alady. Biryńǵai jinaqtaýshy zeinetaqy qorynan tólemder zeinetaqy jinaqtary bitkenshe júzege asyrylady, al ómirdi saqtandyrý kompaniiasynan tólemder aldyn-ala naqty belgilengen mólshermen ómir boiy júzege asyrylady. Sonymen birge, zeinetaqy annýiteti boiynsha tólemder er adamdar 55 jasqa, áielder – 52 jasqa tolǵanda tólenedi», - deidi S. Ájibek.
Onyń aitýynsha, Ómirdi saqtandyrý kompaniiasy zeinetaqy annýiteti tólemderin saqtanýshyǵa ómir boiy ai saiyn tóleidi jáne jyl saiyn tólemderdi 5% paiyzdan kem emes kórsetkishke kóterip otyrady. Sonymen birge, zeinetaqy annýiteti shartynda kepildendirilgen tólem merzimin ornatýǵa bolady, bul optsiia saqtanýshy qaitys bolǵan jaǵdaida zeinetaqy annýiteti tólemderin muragerlerge berý múmkindigin qamtamasyz etedi.
