QR Eńbek jáne halyqty áleýmettik qorǵaý ministri Tamara Dúisenova zeinet jasyn talqylaý týraly vitse-premer Erulan Jamaýbaevtyń málimdemesine jaýap berdi, dep habarlaidy QazAqparat.
Buǵan deiin Premer-Ministrdiń orynbasary, Qarjy ministri Erulan Jamaýbaev qazaqstandyqtardyń zeinet jasyn tómendetý máselesi esh qarastyrylmaǵanyn aitqan edi.
«Munda eshkim ótirik aitpady. Biýdjettik protsesti ózderińiz bilesizder. Qazir bizdiń ministrliktiń Qarjy ministrligimen jáne Ulttyq ekonomika ministrligimen birlesken jumys toby bar. Jumys toby birinshi grafikten ótti. Endi ekinshi grafikte ministrlerdiń aldyna shyǵýymyz kerek. Odan keiin respýblikalyq biýdjettik komissiiaǵa shyǵamyz. Sonda qazir biz birinshi toptaǵy jumysty ǵana bitirdik. Onyń ústine Erulan Jamaýbaev Qarjy ministri ǵana emes, vitse-premer. Biz áli ministrlerdiń aldyna jetken joqpyz», - dep jaýap berdi Dúisenova Parlament palatalarynyń birlesken otyrysynan keiin tilshiler saýalyna.
Sonymen birge, Eńbek ministri eldegi áleýmettik sala, zeinetaqy máseleleri jóninde aityp berdi.
«Qazir zeinetke shyǵyp jatqandardyń zeinetaqylary buryn shyqqan zeinetkerlerdikinen tómen, sebebi eńbek ótilderi az. Sondyqtan qazirgi birinshi másele – bazalyq zeinetaqylardyń parametrlerin ózgertý, iaǵni ony kóbeitý, ekinshi – yntymaqtastyrylǵan zeinetaqy máselerin kóterý, onyń da parametrlerin qarastyrý. Sodan keiin zań aiasynda erte zeinetke shyǵý máselesi de qarastyrylǵan. «Kúmis jas» degen jańa baǵdarlama jasalyp jatyr. Barlyq esepterimizdi jumys tobyna ótkizdik, endi ekinshi kezeńge shyǵyp jatyrmyz. Biýdjetti qaraǵanda jumys tobynda eń aldymen vitse-ministrler jumys isteidi, meniń de vitse-ministrim sol topqa baryp júr. Keiingi topta bul másele ministrler deńgeiinde talqylanady. Sondyqtan, qazir jumys tobynda barlyq ministrlik ókilderi jumys istep jatyr. Al Qarjy ministriniń ony bilý-bilmeýinen meniń habarym joq», - dedi Tamara Dúisenova.
