QR Eńbek jáne halyqty áleýmettik qorǵaý ministri Tamara Dúisenova zeinet jasyn tómendetý týraly suraqtarǵa jaýap berdi, dep habarlaidy QazAqparat.
«Jalpy zeinetaqy júiesi týraly aitylǵan kezde sizder bir nárseni bilgenińiz jón. Biz 1998 jyly zeinetaqy júiesin reformaladyq. Sol reformaǵa sáikes, 1998 jyldyń 1 qańtaryna deiin eńbek ótili bar azamattar ǵana memleketten eńbek zeinetaqysyn alady, sodan keiin oǵan qosymsha bazalyq zeinetaqyny alady. Al eger biz zeinet jasyn tómendetetin bolsaq, onsyz da eńbek ótili tómendep kele jatyr, zeinetaqy da óte tómen bolady», - dedi Tamara Dúisenova Senatta tilshilerge bergen suhbatynda.
Ministr azamattardyń zeinetke erte shyǵý múmkindigi de bar ekenin eske saldy.
«Sondyqtan azamattar 1998 jyldan keiin jinaqtaýshy zeinetaqyǵa óz ýaqytynda qosylyp otyrsa, jarnasy durys bolsa, 63 emes, tipti 50 jasynda zeinetke shyǵyp ketýge múmkindigi bar dep zańda jazylyp qoiǵan. Sondyqtan da azamattardyń eń negizgi jumysy – zeinetaqy júiesine ýaqytynda qosylyp, ýaqytynda jarnasyn tólep otyrsa, zeinetke erte shyǵýǵa tolyq múmkindigi bar. Bul áielder ǵana emes, er adamdarǵa da qatysty», - dedi Eńbek ministri.
