Aqmola oblysy aýdandary men Kókshetaý, Stepnogorsk qalalary ákimderiniń «Rýhani jańǵyrý» baǵdarlamasynyń iske asyrylýy boiynsha óz óńirlerinde atqaryp jatqan jumystary týraly baspasóz máslihattary bastaldy. Osy aidyń aiaǵyna deiin ótetin bul sharany Tselinograd aýdanynyń ákimi Málgajdar Tátkeev pen Zerendi aýdanynyń ákimi Berikjan Ábýtálipov bastap berip otyr.
– Aýdanymyzda baǵdarlamanyń barlyq baǵyttary iske asyrylýda. Ólkemizdegi tarih jáne sáýlet eskertkishteri, kieli jerler, aýdanymyzdan shyqqan ataqty tulǵalar jaily kóptegen materialdar jinadyq, – dei kele, Zerendi aýdanynyń ákimi Berikjan Ábýtálipov búgingi tańda aýdanda neolit, paleolit, orta ǵasyr, qola dáýirlerine jatatyn 16 tarihi-mádeni mura eskertkishteri baryn, olardyń barlyǵynda QR-kodtar ornatylǵanyn atap ótti.
Osylardyń ishinde eń tanymaly – Ýáli han mazary. Aqkól aýyldyq okrýgine qarasty Qazaqstan aýylynyń mańynda ornalasqan kieli nysanǵa tarihshylar men týrister kóptep kelýde. Tarihi eskertkishke kásipker-metsenat Boris Kozlovtyń qoldaýymen qalpyna keltirý jumystary júrgizilipti. Sondai-aq, búgingi tańda týristerdiń zerli Zerendidegi Áýliebulaq sarqyramasyna, Áýlietasqa degen qyzyǵýshylyǵy jyldan jylǵa artyp kele jatqany brifingte keńinen aityldy. Biylǵy jyldyń alǵashqy alty aiynda mundaǵy kieli oryndardy tamashalaýǵa úsh myńnan astam adam kelipti.
Budan bólek, aýdanda arheologiialyq qazba oryndary da bar. Bul Keńótkel, Ormandy Bulaq qorymdary. Biyl oblystyq tarihi-mádeni murany qorǵaý jáne paidalaný ortalyǵynyń arheologtarymen Vasilkovka aýylynyń mańynda qazba jumystary júrgizilip, Saq jaýyngeriniń súiekteri tabylypty.
–«Aýyl – el besigi» arnaiy jobasyn iske asyrý úshin respýblikalyq biýdjetten jaqsy qoldaý kórsetilip otyr. Qarjylandyrýdyń jalpy somasy 1,3 milliard teńgeni qurady. Bul baǵyt boiynsha aýdan ortalyǵynyń toǵyz kóshesiniń joldaryn jóndeý jáne ortalyq kóshede trotýarlar ornatý jumystary bastaldy, – dei kele Berikjan Ábýtálipov «Týǵan jer» baǵdarlamasynyń iske asyrylýy jóninde de toqtalyp, baǵdarlamany birden qoldap áketken, aýyldardy kórkeitýge úles qosyp jatqan metsenattarǵa zor rizashylyǵyn jetkizdi. Ásirese, kásipkerler Boris Kozlovtyń, Jumaǵul Joldyqovtyń esimderin erekshe atap ótti. Brifing sońynda aýdan ákimi buqaralyq aqparat quraldary ókilderiniń qoiǵan saýaldaryna jaýap berdi.
