Vitalii Shishovty eske alý sharasy. Kiev, Ýkraina, 3 tamyz, 2021 jyl.
Ýkraina quqyq qorǵaý organdary el aýmaǵynda turyp jatqan, qaýip tónýi múmkin degen Belarýs azamattaryn qorǵaýy tiis. Ýkraina prezidenti Vladimir Zelenskii 4 tamyzda osyndai pármen berdi. Prezident baspasóz qyzmetiniń habarlaýynsha, quqyq qorǵaý organdary kei belorýs belsendilerine qaýip tónýi múmkin degen habar alǵan soń ári Ýkrainada turyp jatqan belorýs belsendisi Vitalii Shishov qaza tapqan soń memleket basshysy osyndai sheshimge kelgen.
Seisenbi kúni Kievtegi saiabaqta asylyp turǵan Shishovtyń denesi tabylǵan. Onyń denesinen qulaǵan kezde alatyn jaraqattar baiqalǵan. "Kisi óltirý" baby boiynsha qylmystyq is qozǵaldy. Ózin-ózi óltirý jáne kisi óltirýdi jabý maqsatynda sýitsid kórinisterin jasaý versiialary qarastyrylyp jatyr. "Ýkrainadaǵy belorýs úii" uiymyn basqarǵan Shishov jaqtastarynyń aitýynsha, ony ádeii óltirgen ári bul belorýs arnaiy qyzmetiniń isi bolýy yqtimal. Shishov Aleksandr Lýkashenko rejimine ashyq qarsy shyqqan. "Ýkrainadaǵy belorýs úiiniń" málimdemesinde Shishovtyń qazasy – "rejimge shynymen qaýipti belorýstyń kózin joiý maqsatynda chekister uiymdastyrǵan operatsiia" dep sipattalady.
Zelenskii Ýkraina qaýipsizdik qyzmeti men ishki ister ministrligine "Ýkrainaǵa sońǵy bir jylda kelgen jáne saiasi hám qoǵamdyq áreketine bailanysty qylmystyq qol suǵý qaýpi tónýi múmkin degen Belarýs Respýblikasy azamattaryn tolyq qorǵaýdy" tapsyrdy. Qorǵaýǵa alynatyn belorýs azamattarynyń tizimi de jasaldy.
Buǵan qosa, Zelenskii Vitalii Shishov óliminiń jai-japsaryn tolyq zertteýdi tapsyrdy.
- "Ýkrainadaǵy belorýs úii" — kommertsiialyq emes uiym. Ol jumys taýyp, páter jaldap, zańdy túrde turý maqsatynda Ýkrainaǵa qashqan Belarýs azamattaryna kómek kórsetýmen ainalysady. Belarýstegi Rechitsa qalasynda turǵan Vitalii Shishov byltyr tamyzda ótken prezident sailaýynan soń Ýkrainaǵa qonys aýdarǵan.
- Bul prezident sailaýynyń resmi qorytyndysy el ishinde jappai narazylyqqa túrtki boldy. Batys elderi Lýkashenkony zańdy prezident dep tanymaitynyn málimdep, sailaý nátijesin burmalaǵany jáne narazylyq sharalaryn basyp-janyshtaǵany úshin oǵan jáne onyń ainalasyndaǵy adamdarǵa kóp sanktsiia saldy.
