Ýkraina prezidenti Vladimir Zelenskii. 20 mamyr 2021 jyl.
Resei men Ýkraina arasynda eki el basshysynyń kezdesýin uiymdastyrý boiynsha kelissóz júrip jatyr. Bul týraly beisenbi kúngi baspasóz máslihaty kezinde Ýkraina prezidenti Vladimir Zelenskii málimdedi, dep jazady Azattyq.
Zelenskii bul jaily sáýir aiynda da aitqan, kezdesýdi qarýly qaqtyǵys jalǵasyp jatqan Donbasta ótkizýge bolatyndyǵyn da alǵa tartqan. Artynsha Pýtin Zelenskiidi Máskeýge shaqyryp, odan keiin bul másele jariia túrde talqylanbaǵan.
Kremldiń baspasóz hatshysy Dmitrii Peskov Kiev pen Máskeý arasynda kelissóz júrip jatqanyn joqqa shyǵarmady, biraq "protsess ońai ótip jatqan joq" jáne ázirge tek boljamnan asqan joq dedi.
Zelenskii baspasóz máslihaty kezinde Pýtinmen kezdesý kerektigin, onsyz Donbastaǵy soǵysty toqtatý múmkin emes ekenin aitty. Ýkraina basshysy sonymen birge Pýtinge minezdeme berýden de bas tartty. Kóptegen ýkrainalyq saiasatker ony "agressor" ári "qylmysker" dep ataidy.
"Eger anaý-mynaý dep oqiǵany ýshyqtyryp alsam, buǵan keshirim joq. Men úshin basty nárse – soǵysty aiaqtaý, al odan keiin kim jaily ne oilaitynymdy aita jatarmyn" dedi ol.
Zelenskii baspasóz jiyny barysynda Ýkrainanyń shetel odaqtastarynyń qoldaýyna úmit artatynyn, biraq Germaniia men Frantsiianyń "sońǵy kezde Reseige qatysty ustanymy biraz álsirep ketkenin" atap ótken.
Zelenskii sonymen birge tamyz aiynda Ýkraina táýelsizdiginiń 30 jyldyǵyn atap ótý josparyna toqtalǵan. Josparda "Qyrym platformasy" halyqaralyq forýmy, áskeri jáne teńiz paradtaryn uiymdastyrý qarastyrylǵan.
Ishki saiasat máselelerine toqtalǵan Zelenskii ózine deiin eldi basqarǵan Petr Poroshenko men aldaǵy prezident sailaýyna qatysýy múmkin delingen Kiev meri Vitalii Klichkony synaǵan.
