Ýkraina prezidenti Vladimir Zelenskii men AQSh prezidenti Djo Baiden telefon arqyly sóilesti. Olar qaýipsizdik jáne Kievke qarjylai kómek kórsetý, odan bólek Reseige qosymsha sanktsiia salý máselesin talqylady, dep habarlaidy Azattyq.
Aq úi habarlamasynda AQSh prezidenti Visa jáne Mastercard tólem júieleriniń Resei bankterimen jumys isteýden bas tartqanyn jyly qabyldaǵany jazylǵan. Baidenniń aitýynsha, Aq úi Ýkrainaǵa gýmanitarlyq jáne ekonomikalyq kómek kórsetýin jalǵastyrady. Qosymsha qarjylandyrý úshin Kongrespen tyǵyz jumys isteidi.
Eki el basshysy sonymen birge Resei men Ýkraina arasyndaǵy jýyrda ótken kelissózdi talqylaǵan. Máskeý men Kiev kelissózdiń úshinshi raýndy jaqyn kúnderi bolatynyn rastady.
Halyqaralyq valiýta qory aldaǵy aptada Ýkrainaǵa shamamen 1,5 mlrd dollar bólý máselesin qaraitynyn málimdegen jáne soǵys ǵalamdyq ekonomikaǵa edáýir keri áser etedi dep eskertken.
AQSh memlekettik hatshysy Entoni Blinken Ýkrainany qoldap, video taratty. Videomálimdemesinde ol soǵys jaily jalǵan aqparattarǵa da qarsy shyqty. "Resei azamattary ózderiniń atynan ne jasap jatqanyn bilýi tiis" dedi memlekettik hatshy.
Memlekettik hatshynyń ekinshi videosynda Ýkrainany qoldaý aktsiialary kórsetilgen.
6 naýryzda Reseidiń barlyq qalalarynda soǵysqa qarsy aktsiialar ótti. Júzdegen adamnyń ustalǵany habarlandy. Kóp belsendiniń úileri men keńselerine tintý júrgizilgen.
"OVD-Info" málimetinshe, 24 aqpannan beri Reseide Ýkrainadaǵy soǵysqa qarsy aktsiialar kezinde 8 myńnan astam adam ustalǵan.
Aita keteiik, Resei áskeri prezident Vladimir Pýtinniń buiryǵymen Ýkrainaǵa 24 aqpanda basyp kirgen. Pýtin NATO Ýkrainany Reseige qarsy shepke ainaldyrǵysy keledi dep málimdegen. Ýkraina men NATO muny joqqa shyǵarady.
AQSh pen Batys elderi Máskeýge qatań sanktsiia saldy. Kóp iri korporatsiia men tanymal brendter Reseiden ketip jatyr.
