Mariýpol qalasy. 18 naýryz 2022 jyl.
Ýkraina prezidenti Vladimir Zelenskii Máskeýmen taǵy kelissóz ótkizý qajettigin aitty. Soǵystyń jalǵasyp jatqanyna úsh aptadan asty. Resei eldiń ońtústik-shyǵysyndaǵy strategiialyq mańyzdy portty qala – Mariýpolge kirgenin habarlady.
"Kezdesetin, sóilesetin ýaqyt. Ýkrainanyń territoriia tutastyǵy men ádildikti ornatatyn sát. Oǵan kelispese, Resei birneshe býyn qalpyna keltire almaityn shyǵynǵa batady" dedi Zelenskii 19 naýryzda Feisbýkte jariialaǵan videosynda.
Kei aqparatqa qaraǵanda, Máskeý úsh aptadan astam ýaqytqa sozylǵan soǵysta kóp soldatynan aiyrylǵan. Zelenskii málimdemesi jariialanǵan kezde Resei birneshe apta qorshaýda bolǵan Azov teńizindegi portty qala Mariýpol ortalyǵyna jetkenin habarlady.
Resei atalǵan qalany bombalap, júzdegen adam panalaǵan teatrdy atqylaǵannan keiin Batys elderi jáne halyqaralyq uiymdar jaǵdaiǵa alańdap, Reseidi "áskeri qylmys jasady" dep aiyptady.
18 naýryzda Resei basshysy Vladimir Pýtinmen telefon arqyly bir saǵat sóilesken Frantsiia basshysy Emmanýel Makron Mariýpoldegi jaǵdaiǵa qatty alańdap otyrǵanyn jetkizdi. Frantsiia basshysy Resei prezidentine qalany qorshaýdan bosatyp, halyqaralyq quqyqty saqtaýǵa úndedi.
