Foto: frontnews.eu
24 qańtarda Ýkraina prezidenti Vladimir Zelenskii soǵys kezinde áskeri qyzmetkerlerdiń jaýapkershiligin kúsheitýge múmkindik beretin Qylmystyq kodekske engen túzetýlerdi maquldady, dep habarlaidy Azattyq radiosy.
13 qańtarda qujatty Joǵarǵy rada qabyldaǵan. Ony osyǵan deiin Ýkraina qarýly kúshteriniń bas qolbasshysy Valerii Zalýjnyi da qoldaǵan.
Jańa zań boiynsha, budan bylai komandirge baǵynbaǵan, buiryqty oryndamaǵan, komandirge qoqan-loqy nemese kúsh kórsetken, óz betimen shaiqas alańyn nemese áskeri bólimdi tastap ketken nemese áskerden qashqan jaýyngerge sot az nemese shartty jaza bere almaidy.
Komandirge baǵynbaǵandarǵa 3-7 jyl aralyǵynda túrme jazasy berilýi múmkin. Qujatta áskerden qashqandarǵa 5-12 jyl, áskeri bólimdi óz betimen tastap ketkenderge 5-10 jyl túrme jazasy qarastyrylǵan.
"Endi sot áskeri qylmystardy qaraǵan kezde istiń jai-japsaryn teksermei úkim shyǵara beredi. Barlyq áskeri qyzmetkerge tek uzaq merzim beriledi" dedi ChESNO quqyq qorǵaý uiymynyń sarapshysy Viktoriia Oleinik.
Osyǵan deiin quqyq qorǵaýshylar Zelenskiidi zań jobasyn bekitpeýge úndegen. Olardyń oiynsha, túzetýler áskeri qyzmetkerlerdiń quqyqtaryn edáýir shekteidi. 2022 jyly jeltoqsanda túzetýlerge qarsy petitsiiaǵa 25 myńnan astam qol jinalǵan.
"Bir jylǵa jýyq ýaqyt boiy reseilikterdiń basqynshylyǵyn tejep, ýkrain jerin azat etip, sátti operatsiia júrgizgen áskerge alǵys aitýdyń ornyna maidannan alysta otyrǵan komandirmen sál de bolsa kelispegenimiz úshin túrme jazasyn alamyz" dep jazdy petitsiia avtory Tatiana Kostogryzenko.
Onyń pikirinshe, komandirler endi budan bylai bopsalaýdyń teńdessiz tetikterine ie bolady, kez kelgen syn úshin jaýyngerdi túrmege jiberýge múmkindik alady.
