فوتو: frontnews.eu
24 قاڭتاردا ۋكراينا پرەزيدەنتٸ ۆلاديمير زەلەنسكيي سوعىس كەزٸندە ەسكەري قىزمەتكەرلەردٸڭ جاۋاپكەرشٸلٸگٸن كٷشەيتۋگە مٷمكٸندٸك بەرەتٸن قىلمىستىق كودەكسكە ەنگەن تٷزەتۋلەردٸ ماقۇلدادى, دەپ حابارلايدى ازاتتىق راديوسى.
13 قاڭتاردا قۇجاتتى جوعارعى رادا قابىلداعان. ونى وسىعان دەيٸن ۋكراينا قارۋلى كٷشتەرٸنٸڭ باس قولباسشىسى ۆالەريي زالۋجنىي دا قولداعان.
جاڭا زاڭ بويىنشا, بۇدان بىلاي كومانديرگە باعىنباعان, بۇيرىقتى ورىنداماعان, كومانديرگە قوقان-لوقى نەمەسە كٷش كٶرسەتكەن, ٶز بەتٸمەن شايقاس الاڭىن نەمەسە ەسكەري بٶلٸمدٸ تاستاپ كەتكەن نەمەسە ەسكەردەن قاشقان جاۋىنگەرگە سوت از نەمەسە شارتتى جازا بەرە المايدى.
كومانديرگە باعىنباعاندارعا 3-7 جىل ارالىعىندا تٷرمە جازاسى بەرٸلۋٸ مٷمكٸن. قۇجاتتا ەسكەردەن قاشقاندارعا 5-12 جىل, ەسكەري بٶلٸمدٸ ٶز بەتٸمەن تاستاپ كەتكەندەرگە 5-10 جىل تٷرمە جازاسى قاراستىرىلعان.
"ەندٸ سوت ەسكەري قىلمىستاردى قاراعان كەزدە ٸستٸڭ جاي-جاپسارىن تەكسەرمەي ٷكٸم شىعارا بەرەدٸ. بارلىق ەسكەري قىزمەتكەرگە تەك ۇزاق مەرزٸم بەرٸلەدٸ" دەدٸ چەسنو قۇقىق قورعاۋ ۇيىمىنىڭ ساراپشىسى ۆيكتورييا ولەينيك.
وسىعان دەيٸن قۇقىق قورعاۋشىلار زەلەنسكييدٸ زاڭ جوباسىن بەكٸتپەۋگە ٷندەگەن. ولاردىڭ ويىنشا, تٷزەتۋلەر ەسكەري قىزمەتكەرلەردٸڭ قۇقىقتارىن ەدەۋٸر شەكتەيدٸ. 2022 جىلى جەلتوقساندا تٷزەتۋلەرگە قارسى پەتيتسيياعا 25 مىڭنان استام قول جينالعان.
"بٸر جىلعا جۋىق ۋاقىت بويى رەسەيلٸكتەردٸڭ باسقىنشىلىعىن تەجەپ, ۋكراين جەرٸن ازات ەتٸپ, سەتتٸ وپەراتسييا جٷرگٸزگەن ەسكەرگە العىس ايتۋدىڭ ورنىنا مايداننان الىستا وتىرعان كومانديرمەن سەل دە بولسا كەلٸسپەگەنٸمٸز ٷشٸن تٷرمە جازاسىن الامىز" دەپ جازدى پەتيتسييا اۆتورى تاتيانا كوستوگرىزەنكو.
ونىڭ پٸكٸرٸنشە, كومانديرلەر ەندٸ بۇدان بىلاي بوپسالاۋدىڭ تەڭدەسسٸز تەتٸكتەرٸنە يە بولادى, كەز كەلگەن سىن ٷشٸن جاۋىنگەردٸ تٷرمەگە جٸبەرۋگە مٷمكٸندٸك الادى.
