Prezident Vladimir Zelenskii Ýkraina Reseimen diplomatiialyq qarym-qatynasty úzgenin málimdedi, dep habarlaidy "Ult aqparat".
"Biz Reseimen diplomatiialyq qarym-qatynasty úzdik. Biz qarý-jaraq taratyp jatyrmyz jáne jerimizdi qorǵaý úshin barlyǵyn jasaimyz", - dedi Zelenskii beisenbide ótken brifingte.
Onyń sózine qaraǵanda, qazir Ýkraina Qarýly kúshteri "naǵyz aýyr soǵysty bastan keshirip jatyr".
Aita keteiik, 24 aqpanda Resei prezidenti Vladimir Pýtin Donbassta arnaiy áskeri operatsiia bastalatynyn málimdedi. Sonymen qatar ol Reseidiń josparynda Ýkrainany basyp alý maqsaty joqtyǵyn aitty.
Keiinirek Reseidiń Ýkrainaǵa tolyqqandy shabýyldy bastaǵany habarlanǵan bolatyn. Jergilikti turǵyndar da Resei men Ýkraina shekarasyndaǵy birqatar qalada jarylys bolǵanyn habarlap jatyr.
Sondai-aq, Ýkraina prezidenti Vladimir Zelenskii búkil elde áskeri jaǵdai jariialanǵanyn málimdedi.
Ýkrinform basylymynyń jazýynsha, eldiń syrtqy saiasi vedomstvosy Reseidiń shabýyldaý operatsiiasy - Ýkrainanyń egemendigi men aýmaqtyq tutastyǵyna shabýyl, BUU Jarǵysyn jáne halyqaralyq quqyqtyń negizgi normalary men qaǵidalaryn óreskel buzý ekenin atap ótken.
«Ýkraina 1963 jylǵy Konsýldyq qatynastar týraly Vena konventsiiasynyń 2-babyna sáikes Reseimen diplomatiialyq qatynastyń úzilgenin málimdeidi. Biz Reseidegi ýkrainalyqtardyń, sonyń ishinde ýkrain saiasi tutqyndarynyń quqyqtary men múddelerin qorǵaýdy jalǵastyramyz», - dep tolyqtyrdy agenttik.
Ýkraina Syrtqy ister ministrligi de Ýkrainanyń Resei Federatsiiasyndaǵy ýaqytsha senimdi ókili Vasilii Pokatilony keńesý úshin Kievke shaqyryp, Máskeýdegi Ýkraina elshiligin evakýatsiialaýdy bastady.
Qazirgi ýaqytta Ýkrainanyń Resei Federatsiiasynyń aýmaǵyndaǵy konsýldyq mekemeleri jumysyn shtattyq rejimde jalǵastyrýda.
