Dúniejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov Aqmola oblysynyń Arshaly aýdanynda uiym bastamasymen qolǵa alynǵan «Turǵyn úi jáne jumys» jobasyna qatysýshylarmen kezdesti. Bul týraly atalmysh qaýymdastyqtyń baspasóz qyzmeti habarlady.
«Kezdesý barysynda Zaýytbek Turysbekov jinalǵan qandastarǵa Dúniejúzi qazaqtary qaýymdastyǵynyń Tóraǵasy Elbasy Nursultan Nazarbaevtyń V Quryltaida bergen tapsyrmalaryn iske asyrý barysy týraly egjei-tegjeili habardar etti. Atap aitqanda, ol Elbasynyń sheteldegi qazaqtardy tarihi otanyna qaitarý, qazaqstandyqtardyń áleýmettik qorǵalmaǵan sanattarynyń turǵyn úi problemalaryn sheshý jáne jańa jumys oryndaryn qurý týraly tapsyrmalary qalai ise asyp jatqanyn baiandady», - dep málim etti baspasóz qyzmetindegiler.
Dúniejúzi qazaqtary qaýymdastyǵy 3 jyldyń ishinde Aqmola jáne Túrkistan oblystarynda baspanaǵa muqtaj jergilikti turǵyndar men qandastarǵa arnap «Asar» ádisimen kottedj qalashyqtaryn salýǵa kirisken bolatyn.
«Jobanyń biregeiligi jer satyp alýǵa jáne úiler salýǵa memlekettik salymdar talap etilmeitindiginde. Óitkeni jer satyp alynyp qoiylǵan, úilerdi jer ieleriniń ózderi Asar ádisi boiynsha salady. Bul joǵary sapaly turǵyn úidiń ózindik qunyn aitarlyqtai tómendetedi. Jylyjailar, mal bordaqylaý ortalyǵy jáne kóterme saýda bazarynyń qurylysy boiynsha usynystar aýditoriianyń jaǵymdy pikirine ie boldy. Óitkeni munyń bári agroqalashyq qurylysyna qatysýshylar men olardyń otbasylaryn jumyspen qamtýǵa baǵyttalǵan», - deidi qaýymdastyq mamandary.
Qaýymdastyq tóraǵasynyń orynbasary eki óńirdegi ilki joba sátti iske assa, kezekte Pavlodar, Jambyl, Aqtóbe, Atyraý, Shyǵys Qazaqstan, Batys Qazaqstan, Qaraǵandy, Qostanai, Soltústik Qazaqstan oblystary turǵanyn da aitty.
Búginde pilottyq joba aimaqtarynda geodeziialyq zertteýler negizinde jer telimderiniń shekaralary anyqtalyp, joldar men basqa da injenerlik jeli ótetin tustar naqtylanǵan. Al kottedjder qurylysy 15 mamyrda bastalǵan bolatyn. Jospar boiynsha, aldaǵy kúzde agroqalashyqtaǵy alǵashqy úiler boi kóterip úlgerýi tiis.
Aqmola oblysynyń Arshaly aýdanynda 196 gektar jer satyp alynǵan. Munda 1282 kottedj salý kózdelip otyr.
«Jerdiń ieleri negizinen Ózbekstannan kelgen jáne eldiń soltústik aimaqtarynda qalýǵa, turýǵa jáne jumys isteýge niet bildirgen qandastar», - deidi joba avtorlary.
