Sheteldegi 1 mln qazaq tarihi Otanyna qaitýǵa niet tanytyp otyr. Bul týraly búgin Aqparat jáne qoǵamdyq damý ministrliginiń keńeitilgen alqa májilisinde Dúniejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov aitty, dep habarlaidy QazAqparat tilshisi.
«Shette júrgen qazaqtar 4-5 mln. dep júrmiz. Biz barlyǵyn aralap shyqtyq. 1 mln adam elge kelemiz dep otyr. Bir jobany Saryaǵash aýdanynda, Tashkent tóńireginde jasamaqpyz. Ózbek aǵaiyndarmen aqyldasyp, kelisip jatyrmyz. Sol jerden 400 gektar jer alyp, Ózbekstan jáne basqa elderden bastapqyda 35 jasqa deiingi mamandyǵy bar jastardy ákelip, jumys ornyn quryp, et, sút óndirip, ony Tashkentke jetkizemiz. Artyq ónimdi Eýropaǵa ne Sibirge ótkizemiz.
Qazaqta «Elge el qosylsa - qut» degen sóz bar. Elbasynyń saiasatynyń arqasynda 27 jylda 1 mln baýyrymyz elge oralyp otyr. Olardyń birazy úisiz-kúisiz, jumyssyz júrgen jaǵdaiy bar. Shet memlekette júrgen qazaqtardyń kóbi osy jaǵdaidyń barlyǵyn biledi. Sol sebepten aldymen elge kelgen baýyrlarymyzdyń jaǵdaiyn jóndesek degen nietpen biraz jumys jasap jatyrmyz», - dedi Zaýytbek Turysbekov.
Sonymen qatar sheteldegi qazaqtardyń qazaq tilin saqtap qalýyna qatysty pikirimen bólisti.
«Biz eriktilerdi daiyndap, shette ómir súrip jatqan qazaq balalarynyń ana tilin 2 jasynan boiyna sińirýdi kózdep otyrmyz. Degenmen ana tilin bilý - qazaq bolý emes. Onyń namysy, ary bolýy kerek. Sol sebepten qazaqtyń boiyna sony sińirý qajet. Sondyqtan qysqa-nusqa úsh minýttyq rolikter daiyndap jatyrmyz», - dedi ol.
.jpeg)