Qazaqstandyq Zarina Diias US Open týrniriniń alǵashqy ainalymynda álemniń 2-raketkasy, aýstraliialyq Eshli Bartimen kúsh synasty, dep habarlaidy "Ult aqparat".
Qarsylastar budan buryn, 2013 jyly Kýala-Lýmpýrda ózara kezdesip, onda E.Barti jeńiske jetken edi.
Bul joly dúniejúzilik reitingte 80-orynda turǵan Zarina birinshi partiiada tamasha óner kórsetti.
Qos birdei breik jasaǵan qazaqstandyq tennisshi 5:0 esebimen alǵa shyqty. Sodan keiin ǵana E.Barti óz geimin aldy. Degenmen Z.Diias bosańsyǵan joq – 6:1.
Ekinshi set áldeqaida tartysty órbidi. Esep 4:3 bolǵan mezette E.Barti breik jasap ketti. Sosyn ózi dop bergende, múmkindigin múlt jibergen joq – 6:3.
Úshinshi, sheshýshi partiiada E.Barti breikpen alǵa shyqty – 2:1. Taǵy bir breik – 5:2. Aqyry ol jeńisti ýysynan shyǵarǵan joq – 6:2.
Báseke 1 saǵat 42 minýtqa sozyldy.
E.Barti ekinshi ainalymda álemniń 73-raketkasy, amerikalyq Loren Devis nemese reitingte 171-satyda turǵan shvetsiialyq Iýhanna Larssonnyń bireýimen kortqa shyǵady.
Jarystyń alǵashqy kúni taǵy bir qazaqstandyq, reitingte 69-satydaǵy Elena Rybakina álemniń 44-raketkasy, chehiialyq Karolina Mýhovamen kúsh synasady.
AQSh-tyń ashyq chempionatynda jekelei synda sondai-aq Iýliia Pýtintseva, erlerden Mihail Kýkýshkin men Aleksandr Býblik kortqa shyǵady.
Qazaqstannyń birinshi, álemniń 39-raketkasy Iu.Pýtintseva bastapqy matchyn reitingte 78-oryndaǵy amerikalyq Medison Brenglmen ótkizedi. Reitingte 47-satydaǵy M.Kýkýshkin álemniń 10-raketkasy, ispaniialyq Roberto Baýtista-Agýtpen sheberlik baiqasady. Al álemniń 75-raketkasy A.Býbliktiń ekinshi ainalymǵa shyǵatyndai múmkindigi bar. Ol negizgi týrnirge irikteý saiystarynan keiin qosylǵan reitingte 232-oryndaǵy kolýmbiialyq Santiago Hiraldonyń shamasyn baiqap kóredi.
Eske sala keteiik, budan buryn Zarina Diiastyń US Open týrnirinde álemniń 2-raketkasymen kezdesetinin, Elena Rybakinanyń negizgi jarysqa joldama alǵanyn jazǵan bolatynbyz.
