قازاقستاندىق زارينا ديياس US Open تۋرنيرٸنٸڭ العاشقى اينالىمىندا ەلەمنٸڭ 2-راكەتكاسى, اۋسترالييالىق ەشلي بارتيمەن كٷش سىناستى, دەپ حابارلايدى "ۇلت اقپارات".
قارسىلاستار بۇدان بۇرىن, 2013 جىلى كۋالا-لۋمپۋردا ٶزارا كەزدەسٸپ, وندا ە.بارتي جەڭٸسكە جەتكەن ەدٸ.
بۇل جولى دٷنيەجٷزٸلٸك رەيتينگتە 80-ورىندا تۇرعان زارينا بٸرٸنشٸ پارتييادا تاماشا ٶنەر كٶرسەتتٸ.
قوس بٸردەي برەيك جاساعان قازاقستاندىق تەننيسشٸ 5:0 ەسەبٸمەن العا شىقتى. سودان كەيٸن عانا ە.بارتي ٶز گەيمٸن الدى. دەگەنمەن ز.ديياس بوساڭسىعان جوق – 6:1.
ەكٸنشٸ سەت ەلدەقايدا تارتىستى ٶربٸدٸ. ەسەپ 4:3 بولعان مەزەتتە ە.بارتي برەيك جاساپ كەتتٸ. سوسىن ٶزٸ دوپ بەرگەندە, مٷمكٸندٸگٸن مٷلت جٸبەرگەن جوق – 6:3.
ٷشٸنشٸ, شەشۋشٸ پارتييادا ە.بارتي برەيكپەن العا شىقتى – 2:1. تاعى بٸر برەيك – 5:2. اقىرى ول جەڭٸستٸ ۋىسىنان شىعارعان جوق – 6:2.
بەسەكە 1 ساعات 42 مينۋتقا سوزىلدى.
ە.بارتي ەكٸنشٸ اينالىمدا ەلەمنٸڭ 73-راكەتكاسى, امەريكالىق لورەن دەۆيس نەمەسە رەيتينگتە 171-ساتىدا تۇرعان شۆەتسييالىق يۋحاننا لارسسوننىڭ بٸرەۋٸمەن كورتقا شىعادى.
جارىستىڭ العاشقى كٷنٸ تاعى بٸر قازاقستاندىق, رەيتينگتە 69-ساتىداعى ەلەنا رىباكينا ەلەمنٸڭ 44-راكەتكاسى, چەحييالىق كارولينا مۋحوۆامەن كٷش سىناسادى.
اقش-تىڭ اشىق چەمپيوناتىندا جەكەلەي سىندا سونداي-اق يۋلييا پۋتينتسەۆا, ەرلەردەن ميحايل كۋكۋشكين مەن الەكساندر بۋبليك كورتقا شىعادى.
قازاقستاننىڭ بٸرٸنشٸ, ەلەمنٸڭ 39-راكەتكاسى يۋ.پۋتينتسەۆا باستاپقى ماتچىن رەيتينگتە 78-ورىنداعى امەريكالىق مەديسون برەنگلمەن ٶتكٸزەدٸ. رەيتينگتە 47-ساتىداعى م.كۋكۋشكين ەلەمنٸڭ 10-راكەتكاسى, يسپانييالىق روبەرتو باۋتيستا-اگۋتپەن شەبەرلٸك بايقاسادى. ال ەلەمنٸڭ 75-راكەتكاسى ا.بۋبليكتٸڭ ەكٸنشٸ اينالىمعا شىعاتىنداي مٷمكٸندٸگٸ بار. ول نەگٸزگٸ تۋرنيرگە ٸرٸكتەۋ سايىستارىنان كەيٸن قوسىلعان رەيتينگتە 232-ورىنداعى كولۋمبييالىق سانتياگو حيرالدونىڭ شاماسىن بايقاپ كٶرەدٸ.
ەسكە سالا كەتەيٸك, بۇدان بۇرىن زارينا ديياستىڭ US Open تۋرنيرٸندە ەلەمنٸڭ 2-راكەتكاسىمەن كەزدەسەتٸنٸن, ەلەنا رىباكينانىڭ نەگٸزگٸ جارىسقا جولداما العانىن جازعان بولاتىنبىز.
