Qazaqstandyq Zarina Diias Strasbýrg WTA týrniriniń ekinshi ainalymyna shyqty, dep habarlaidy "Ult aqparat".
Álemniń 72-raketkasy Z.Diias alǵashqy ainalymda dúniejúzilik reitingte 79-orynda turǵan amerikalyq Kristina Makheilmen kúsh synasty.
Zarinanyń bastapqyda qarsylasy chehiialyq Barbora Strytsova bolyp belgilengenimen, ol kelmei qaldy da, ornyna amerikalyq sportshy shyqty.
Úsh setke sozylǵan match óte tartysty ótti.
Birinshi partiiada tai-breikte K.Makheil basymdylyq kórsetti – 7:6 (7:4).
Ekinshi sette Zarina Diias ese qaiyrdy – 7:5.
Úshinshi, sheshýshi partiiada áýeli qazaqstandyq tennisshi breik jasap, alǵa shyqqanymen, qarsylasy da qarap qalmady. Degenmen esep 4:4 bolǵanda, Zarina breikke qol jetkizdi. Áitse de matchqa dop bergende, sol múmkindigin paidalana almady. Aqyry kezdesý taǵdyry tai-breikte sheshilip, onda qazaqstandyq tennisshi jeńisti julyp aldy – 7:6 (7:3).
Báseke 3 saǵat 11 minýtqa sozyldy.
Zarina ekinshi ainalymda US Open týrniriniń 2017 jylǵy chempiony, álemniń 33-inshi, týrnirdiń 8-raketkasy, amerikalyq Sloan Stivens nemese reitingte 83-satydaǵy japoniialyq Nao Hibinonyń bireýimen synǵa túsedi.
