Qazaqstandyqtar Zarina Diias pen Mihail Kýkýshkin AQSh-ta ótip jatqan Tsintsinnati masters týrniriniń irikteý saiysynda jeńilip qaldy, dep habarlaidy "Ult aqparat".
Álemniń 66-raketkasy Z.Diias dúniejúzilik reitingte 133-orynda turǵan 20 jastaǵy amerikalyq Enn Limen kezdesti.
Qazaqstandyq sportshy tájiribeli ári reitingisi joǵary bolǵanymen, jas qarsylasyna 1:6, 3:6 esebimen ese jiberdi.
Match 1 saǵatqa sozyldy.
Erler arasyndaǵy osy týrnirdiń irikteý básekesinde reitingte 91-satyda turǵan M.Kýkýshkin álemniń 77-raketkasy, ulybritaniialyq Kemeron Norrimen sheberlik baiqasty.
Birshama tartysty ótken kezdesýde K.Norri 7:6 (7:3), 6:2 esebimen jeńiske jetti.
Báseke 1 saǵat 27 minýtqa sozyldy.
Osylaisha Zarina Diias pen Mihail Kýkýshkin irikteý saiysynyń finalyna shyǵa almady. Bul olardyń koronavirýs indetine bailanysty oryn alǵan úzilisten keiingi alǵashqy dodasy bolatyn.
Munyń aldynda qazaqstandyqtardan Iýliia Pýtintseva ǵana jarys jolyna shyqqan edi.
Qazaqstannyń birinshi, álemniń 17-raketkasy Elena Rybakina men Iu.Pýtintseva Tsintsinnatidyń negizgi týrnirinde baq synaidy.
E.Rybakina alǵashqy ainalymda álemniń 27-raketkasy, biyl reseilik tennisshilerdiń kóshbasshysyna ainalǵan Ekaterina Aleksandrovamen qai myqtyny anyqtaidy. Biyl jyl basynda E.Rybakina Qytaidaǵy Shenchjen WTA týrniriniń finalynda osy E.Aleksandrovadan jeńilip qalǵan edi. Endi sonyń esesin qaitara ala ma, ony aldaǵy oiyn kórsetedi.
Álemniń 33-raketkasy Iu.Pýtintseva reitingte ózinen úsh saty tómen turǵan qytailyq Chjan Shýaidyń sheberligin baiqap kóredi.
Bul masters týrnir 22 tamyzda bastalyp, 28-inde márege jetedi.
Erler arasynda Tsintsinatidyń negizgi jarysynda Qazaqstannyń birinshi, álemniń 51-raketkasy Aleksandr Býblik birinshi ainalymda reitingte 15-orynda turǵan reseilik Karen Hachanovpen kortqa shyǵady.
