Sońǵy sátte Halyqaralyq tennis federatsiiasynyń qosymsha kvotasy arqyly Olimpiada joldamasyna ie bolǵan qazaqstandyq tennisshi Zarina Dias búginde Tokioda daiyndyq ústinde. Olimpiadada júrgen otandyq BAQ ókilderine zoom arqyly suhbat bergen tennisshi óziniń daiyndyǵy men aldaǵy maqsatymen bólisti, dep jazady "Jas Alash" gazeti.
‒ Shveitsariiadaǵy týrnirden keiin birden Amsterdam arqyly Olimpiada astanasy Tokioǵa eki kún buryn ushyp keldim. Áýejaidaǵy jeti saǵattan asa ýaqyt boiy tekseris kádimgidei sharshatady eken.
‒ Osydan birneshe jyl buryn Tokioda ótken ITF jarysynda jeńimpaz atanǵan edińiz. Japoniia sizge jeńis alyp keletin memleket dep aita alasyz ba?
‒ Solai desem de bolady. Tokionyń atmosferasy unaidy. Sondyqtan Olimpiadada jaqsy nátije kórsetemin dep oilaimyn.
‒ Olimpiada joldamasyn alǵanyńyz týraly jańalyqty qalai qabyldadyńyz?
‒ Alǵashqyda reiting boiynsha Olimpiadaǵa bara almaitynymdy bilgenimde kóńil-kúiimniń túskeni ras. Biraq indetke bailanysty kóptegen tennisshi Olimpiadaǵa barýdan bas tartyp jatqanyn estigende múmkindigim bar ekenin bildim. Al jaǵymdy jańalyqty estigende qatty qýandym. Shveitsariiadaǵy jarysta aiaǵymnan kishigirim jaraqat alyyp qaldym. Degenmen, jarysqa deiin jaraqatym jazylady dep oilaimyn.
‒ Olimpiada qalashyǵyndaǵy sportshylardyń jaǵdaiy qalai?
‒ Karantinge bailanysty kóp shekteý bolǵanyna qaramastan, biz buǵan úirenip qaldyq. Olimpiada qalashyǵynda bári keremet. Taǵamy jaqsy, jattyǵý zaldary yńǵaily. Tek aýa-raiy ystyq demeseńiz.
‒ Olimpiadaǵa bári júlde úshin keletini anyq. Kimdi favorit, kimdi basty qarsylas sanaisyz? Jalpy, daiyndyǵyńyz qalai?
‒ Árbir sportshynyń júlde alýǵa múmkindigi bar. Sondyqtan kimniń favorit ekenin aita almaimyn. Meniń de daiyndyǵym jaqsy, júlde alý úshin barymdy salamyn. Qazaqstan erler quramasy qorjynǵa júlde salady degen senimim bar. Ásirese, juptasyp synǵa túsýshiler sensatsiia jasap, tarihi jetistikke jetedi dep oilaimyn.
Aita keteiik, jekelei synda Olimpiadada alty tennisshi júlde úshin talasady. Olar ‒ Zarina Diias, Iýliia Pýtintseva, Elena Rybakina, Iaroslava Shvedova, Mihail Kýkýshkin jáne Aleksandr Býblik. Al juptyq synda Andrei Golýbev pen Aleksandr Býblik baq synaidy.
