Qańtar oqiǵasynan zardap shekkenderdiń qaryzyn keiinge shegerýdiń eki túrli nusqasy usynylady. Bul týraly QR Qarjy naryǵyn retteý jáne damytý agenttigi Qarjylyq qyzmetterdi tutynýshylardyń quqyqtaryn qorǵaý departamentiniń direktory Aleksandr Terentev aityp berdi, dep habarlaidy QazAqparat.
«Qaryzdy keiinge qaldyrý úshin qaryz alýshy kez kelgen qoljetimdi bailanys tásilimen nemese kreditorǵa jeke barý arqyly erkin formada ótinish jazýy qajet. Bul – 2022-2021 jyldardaǵy pandemiiada qoldanylǵan keiinge shegerýdiń óte ikemdi joly. Osy kezeńde keiinge shegerýdi 2,5 mln-nan astam azamat nemese jeke tulǵalar arasynda barlyq qaryz alýshylardyń 3,8%-y paidalandy, keiinge qaldyrylǵan tólemder somasy 270 mlrd teńgeden asady. Barlyq zardap shekken qaryz alýshylarǵa ótinish jasaýǵa jetkilikti ýaqyt berý úshin ótinish úsh ai ishinde, iaǵni 2022 jylǵy 5 sáýirge deiin qabyldanady», - dedi A. Terentev Ortalyq kommýnikatsiialar qyzmetinde ótken baspasóz máslihatynda.
Bul rette, ótinish berilgen kúnge qaramastan, nesieni keiinge shegerý TJ rejimi engizilgen kúnnen bastap beriledi.
«Biz tártipsizdikter kezinde eń kóp zardap shekken qaryz alýshylar úshin óz biznesin qalpyna keltirýge uzaq ýaqyt qajet bolatynyn túsinemiz, sondyqtan nesie berýshi men qaryz alýshynyń kelisimi boiynsha 3 ailyq keiinge shegerýdiń ornyna basqa uzaq merzimdi keiinge qaldyrý merzimi belgilenýi múmkin. Qazir qaryz alýshylar úshin keiinge shegerý merzimi aiaqtalǵannan keiingi nesie óteý tártibi mańyzdy másele bolyp otyr. Qaryz alýshyǵa keiinge qaldyrylǵan tólemderdi óteýdiń eki balama tásilin tańdaý usynylady. Birinshisi – buryn keiinge shegerilgen tólemderdi qaryz merziminiń sońyna deiin birkelki bólý nemese nesie boiynsha qazirgi tólemderdiń mólsherin saqtaý úshin qaryz merzimin ulǵaitý. Kredittik uiymnyń kelisimimen qaryz alýshyǵa ózge keste belgilenýi múmkin», - dedi spiker.
Agenttik ókili nesie boiynsha keiinge shegerýmen bailanysty qaryz alýshylardyń quqyqtaryn qorǵaý boiynsha eki mańyzdy shartty atap ótti. Birinshisi – nesie uiymdary qaryz alýshylardan nesieni keiinge qaldyrýǵa bailanysty operatsiialardy júrgizý kezinde eshqandai komissiialar men basqa tólemderdi almaidy. Ekinshisi – keiinge qaldyrý kezeńinde kreditorlar qaryz alýshylar boiynsha jumys júrgize almaidy, onyń ishinde olardy merzimi ótken bereshekti óteý qajettiligi týraly habardar ete almaidy.
