- Beibit jiyndar men miting uiymdastyrǵany, ultaralyq arazdyqty qozdyrǵany jáne jalǵan lańkestik úshin sottalǵandar raqymshylyqqa ilikpeidi.
Búgin Parlament Májilisinde «Qazaqstan Respýblikasy Táýelsizdiginiń 25 jyldyǵyna bailanysty raqymshylyq jasaý týral» zań jobasy boiynsha jumys toby otyrysynyń aldynda tilshilerge suhbat bergen QR Bas prokýrorynyń birinshi orynbasary Iogan Merkel osylai málim etti, dep habarlaidy Ult.kz tilshisi QazAqparat agenttigine silteme jasap.
«Bul bap zań jobasynyń tizilimine raqymshylyqqa shekteý retinde engizilgen. Iaǵni, osy baptar boiynsha raqymshylyq qoldanýǵa shekteý qoiylǵan. Sonymen qatar, bir top adam jasaǵan jemqorlyq qylmysqa nemese asa aýyr qylmystarǵa da tyiym salynady», - dedi Merkel.
Onyń aitýynsha, asa aýyr jemqorlyq qylmys jasaǵandar shyǵyndy tolyq kólemde ótegen jaǵdaida jazany óteý merzimderin qysqartatyn bolady.
Budan buryn habarlanǵandai, osy aptada Parlament Májilisiniń jalpy otyrysynda «Qazaqstan Respýblikasy Táýelsizdiginiń 25 jyldyǵyna bailanysty raqymshylyq jasaý týraly» QR Zańynyń jobasy jumysqa alyndy.
Eske sala keteiik, Memleket basshysy Nursultan Nazarbaev Konstitýtsiianyń 61-babynyń 1-tarmaǵyna sáikes óz bastamasymen Parlament Májilisiniń qaraýyna «Qazaqstan Respýblikasy Táýelsizdiginiń 25 jyldyǵyna bailanysty raqymshylyq jasaý týraly» zań jobasyn engizdi. Bul raqymshylyq sharasy zań buzǵan azamattarǵa qatysty izgilik aktisi, memleket tarapynan meiirimdilik pen senim bildirýdiń kórinisi bolyp sanalady.
Zań jobasyna sáikes, azamattardyń áleýmettik álsiz toptary, sonyń ishinde kámeletke tolmaǵandar, júkti áielder, kámeletke tolmaǵan nemese múgedek balalary bar áielder, múgedekter, qart adamdar, sondai-aq aýyr emes qylmystyq quqyq buzýshylyqtar jasaǵandar qylmystyq jazadan bosatylady.
Memleket basshysy engizgen zań jobasy aǵymdaǵy jyldyń 30 qarashasynda Májilistiń jumysyna alynǵan edi.
