Foto ashyq derekkózden alyndy
Zańsyz berilgen jáne paidalanylmaǵan 10 mln gektar jer memleketke qaitaryldy, - dep habarlaidy "Ult aqparat" Aýyl sharýashylyǵy ministrliginiń baspasóz qyzmetine silteme jasap.
Vedomstvo málimetinshe, onyń 2,8 mln gektary jergilikti fermerlerge, óńirlerdiń turǵyndaryna qaita bólingen. Budan bólek, osyǵan deiin paidalanylmaǵan 3,4 million gektar jerdi ieleri igerýge kirisken.
"Memleket basshysy óz Joldaýynda zańsyz úlestirilgen jáne paidalanylmai bos jatqan 10 mln gektar jerdi memleket menshigine qaitarý týraly tapsyrma bergen bolatyn. Úkimet bul tapsyrmany 2022-2023 jyldary tolyq oryndady. Búginde Aýyl sharýashylyǵy ministrligi eldiń strategiialyq resýrsyn utymdy paidalaný jónindegi mindetter keshenin iske asyrýdy jalǵastyryp jatyr. Al negizgileriniń biri – aýyldyq okrýgterdegi eldi mekenderdiń ainalasyndaǵy jaiylym tapshylyǵyn azaitý.
2023 jyly Interaktivti karta jańartyldy (Jerkarta.gharysh.kz), onda qazir barlyq qaitarylǵan aýylsharýashylyq jeriniń ornalasqan orny men aýdany kórsetilgen. Sondai-aq, jaiylymdyq jerlerde tapshylyqqa ushyraǵan aýmaqtardyń ornalasqan jeri týraly derekterdi interaktivti kartaǵa engizý jumystary aiaqtaldy. Bul qaitarylǵan jer ýchaskelerin eskere otyryp, qajet bolǵanda jaiylymǵa jer berý úshin aimaqtyń búkil beinesin anyq kórýge múmkindik beredi" - delingen habarlamada.
Vedomstvo málimetinshe, qyzmetti qaǵazsyz kórsetý jáne jer ýchaskelerin berý rásimin avtomattandyrý úshin JMBMK AJ iske qosylǵan. Aqparattyq júie ashyq túrde jumys isteidi, paidalanýshylarǵa jariia kadastrlyq kartada jergilikti atqarýshy organdarǵa oǵan quqyq berý týraly ótinish qaldyrý úshin ýchaskeni tańdaýǵa múmkindik beredi.
"Astana, Almaty, Shymkent qalalarynda, oblystyq jáne aýdandyq mańyzy bar qalalarda jer ýchaskelerin berýdiń elektrondyq tártibi zańnamalyq túrde engizildi. Tsifrlyq aýyl sharýashylyǵy kartalary jasalyp jatyr. 2023 jyldyń qorytyndysy boiynsha barlyǵy 145 mln ga aýyl sharýashylyǵy jerleri tsifrlandyryldy, bul elimizdiń aýyl sharýashylyǵy alqaptarynyń 77%-yn quraidy. Aýyl sharýashylyǵy jerlerin tsifrlandyrýdy tolyǵymen 2025 jyly aiaqtaý josparlanyp otyr.
Jerdi sapaly jáne utymdy paidalanýdy arnaiy qurylǵan memlekettik institýt – "GIPROZEM" RMK qadaǵalaityn bolady. Kásiporyn ekonomikalyq baǵalaý, jer monitoringi, topyraq, geobotanikalyq, topyraqqa agrohimiialyq zertteýler júrgizbek. Barlyq aýyl sharýashylyǵy jerin tsifrlandyrý aiaqtalǵannan keiin topyraqtyń sapalyq sipattamalary men jaiylymdyq jerlerdiń jem-shóp syiymdylyǵy bar jeke ashyq elektrondyq karta qurylady" - delingen ministrlik habarlamasynda.
