Memleket basshysynyń tapsyrmasy boiynsha quqyq qorǵaý organdary COVID-2019 pandemiiasy kezinde dári-dármekterdi alyp-satýdyń jáne zańsyz ainalymǵa túsirýdiń jolyn kesý jumystaryn júrgizdi, dep habarlaidy Aqordanyń baspasóz qyzmeti.
Dárihanalarda medikamentterdi qymbat baǵada satýǵa qatysty 1 myńǵa jýyq derek tirkeldi. Mysaly, Batys Qazaqstan oblysyndaǵy dárihanalardyń birinde «Arbidol» dárisiniń baǵasy shekti deńgeiden eki ese joǵarylatylyp, bekitilgen 2312 teńgeniń ornyna 5000 teńgeden satylǵan.
Sonymen qatar dárihanalardan tys jerlerde qaýipsizdik litsenziialary men sertifikattary joq dári-dármekter men meditsinalyq buiymdardy zańsyz satýǵa qatysty 300-den astam jaǵdai anyqtaldy. Sonyń ishinde, Jambyl oblysynda dári-dármekterge jalǵan qaýipsizdik sertifikaty jasalǵan jáne farmatsevtikalyq qyzmetke litsenziiasy joq quny 44 million teńge bolatyn Qyrǵyzstannan ákelingen 82 preparat túrin satýǵa tosqaýyl qoiyldy.
Jalpy zańsyz ainalymnan quny 230 million teńgeden asatyn 10 million býma dári-dármekter men meditsinalyq buiymdar tárkilendi. Anyqtalǵan zań buzýshylyq derekter boiynsha 3 sotqa deiingi tergeý amaldary júrgizilýde jáne 1183 adam ákimshilik jaýapqa tartylǵan.
Densaýlyq saqtaý ministrligi dári-dármekterdiń bólshek saýdadaǵy shekti baǵasyn qoiý úshin olardyń tizimin tolyqtyrý máselesin pysyqtaýda.
Sonymen qatar meditsina qyzmetkerlerine ústemaqy tóleý kezinde bolatyn zań buzýshylyqtardy anyqtaýǵa qatysty keshendi sharalar jalǵasýda.
Júrgizilip jatqan jumystar men qylmystyq isterdiń tergelýi Qaýipsizdik Keńesi Apparatynyń qatań baqylaýynda.
