Foto: elements.envato.com
Senat depýtattary "Zańsyz iemdenilgen aktivterdi memleketke qaitarý týraly" zańdy maquldady, dep habarlaidy Sputnik Qazaqstan.
Zańǵa sáikes, zańsyz baiyǵan jeke jáne zańdy tulǵalardyń reestri jasalady. Tizim jabyq bolady. Burynǵy sheneýnikter men memlekettik uiymdardyń eks-basshylary da, olarmen bailanysta bolǵan barlyq adam kúdiktiler qataryna kirýi múmkin. Mysaly, jaqyn týystary, tanystary, kólik júrgizýshisi, tipti úi qyzmetshisi de kúdikke ilinýi yqtimal.
Tizim jabyq bolsa da, ashyq jumys isteitin arnaiy komissiia qurylady. Onyń quramyna quqyq qorǵaý jáne memlekettik organdardyń birinshi basshylary ǵana emes, qoǵam belsendileri men depýtattar da kiredi.
Zańsyz iemdenilgen aktivterdi qaitarý boiynsha arnaiy memlekettik qor jáne basqarýshy kompaniia da qurylady. Elge qaitarylǵan qarajat qordyń shotyna túsedi. Al basqarýshy kompaniianyń mindeti – zańsyz alynǵan múlikti satyp, aqshasyn arnaiy qorǵa aýdarý. Basqarýshy kompaniianyń jalǵyz quryltaishysy úkimet bolady.
Qaitarylǵan aqsha Qazaqstan halqynyń ál-aýqatyn arttyrýǵa baǵyttalǵan áleýmettik jáne ekonomikalyq jobalardy qarjylandyrýǵa jumsalady.
Zań jobasynda aktivterdi qaitarýdyń erikti nemese májbúrli tártibi qarastyrylǵan.
• erikti túrde qaitarý. Ózderine tiesili múlikti memleketke óteýsiz berý jolymen júzege asady;
• sottyń sheshimi negizinde qylmystyq protsess aiasynda zańsyz alynǵan aktivterdi tárkileý;
• sot aktivterdi negizsiz bailyq retinde tanysa jáne múliktiń qylmystyq jolmen alynǵany dáleldense, zańsyz alynǵan aktivterdi májbúrlep qaitarý;
• sottyń nemese shet memleketterdiń ózge de ýákiletti organdarynyń sheshimderi negizinde tárkileý;
Búgin senatorlar zańdy birden eki oqylymda maquldady. Endi, oǵan Prezident qol qoiýy tiis. Osydan keiin zań kúshine enedi.
