Elimizde zańdardyń jii ózgertilip jáne tolyqtyrylyp otyrýy quqyqtyq memleket qurý jolyndaǵy talpynysymyz. Sońǵy kezde jii aitylyp júrgen ákimshilik jáne qylmystyq zańnamany izgilendirý jaiy da sonyń kórinisi, dáleli.
Atalmysh máseleni sóz etkende Elbasynyń halyqqa joldaýyna arqa súieitinimiz anyq. Óitkeni, joldaý - memleketimizdiń áleýmettik-ekonomikalyq qana emes, sonymen birge quqyqtyq damý jolyn da aiqyndap otyratyn qujat.
Biylǵy joldaýynda Prezident Nursultan Nazarbaev bul joldaý jańa álemge, iaǵni «Tórtinshi ónerkásiptik revaliýtsiia» álemine beiimdelý men jetistikke jetý jolyn aiqyndaidy dei kele, sot jáne quqyq qorǵaý júielerin institýtsionaldy turǵydan ózgertý mindetin qoidy. Zańnamaǵa qylmystyq protsestegi azamattardyń quqyqtaryn qorǵaý isin kúsheitýdi, onyń ásire qatańdyǵyn báseńdetýdi kózdeitin normalar engizilgenin atap ótti.
Qylmystyq zańnamany izgilendirý de osy mindet aiasynda júktelip otyr. Táýelsizdiktiń alǵashqy jyldaryndaǵy toqyraýda túrli qylmystar beleń alyp, qylmys deńgeiiniń artqany málim. Bul óz kezeginde zańdardy qataitý qajettiligin týdyrǵany sózsiz.
«Tártipke baǵynǵan el qul bolmaidy» dep batyr Baýyrjan Momyshuly aitqandai, bar salada tártip ornatý úshin talapty kúsheitý kerek boldy. Al, qazir zamannyń didary ózgerdi. Soǵan sáikes kei baptardaǵy jaza túrlerin jeńildetý, zańdardy izgilendirý sekildi sharalar búgingi kúnniń talabyna ainalyp otyr.
Elbasynyń joldaýdaǵy tapsyrmasyna sáikes, mundai ózgertýler men tolyqtyrýlar kóbine ekonomikalyq qylmys túrlerine qatysty oryn almaq. Buǵan deiin de jańadan qabyldanǵan Qylmystyq kodekske «qylmystyq teris qylyq» uǵymy engizilip, zańdy izgilendirý jolynda qadam jasalǵan bolatyn.
Jalpy alǵanda, zańdy izgilendirý arqyly qoǵamdy izgilendiretinimizdi umytpaýymyz kerek.
Marat Nurbekov,
Almaty qalasy Alataý aýdandyq sotynyń sýdiasy
