Foto: freepik.com
Ádilet ministri Azamat Esqaraev zańdardyń memlekettik tildegi mazmunyna bailanysty pikir bildirdi, dep habarlaidy Kazinform agenttigi.
«Zańdardy Ádilet ministrliginde tirkegen kezde memlekettik nusqasyna saraptama jasaisyzdar ma? Óitkeni qazaqsha zańnyń túsiniksiz ekeni týraly shaǵym kóp. Eger zańnyń memlekettik tildegi nusqasy túsiniksiz, sapasyz bolsa, keri qaitara alasyzdar ma?», – dep surady jýrnalist vedomstvo brifinginde.
Azamat Esqaraevtyń aitýynsha, ministrlikte ondai quzyret bar.
«Qoldanystaǵy zańnama boiynsha ár mátinde, ár tilde jazylǵan tekst halyqqa túsinikti, qoldanýǵa jeńil bolýy kerek degen talap kózdelgen. Eger memlekettik tilde olqylyqtar bolsa, tiisti mamandar men sarapshylar sol olqylyqtardy anyqtasa, ondai zań jobasyn tirkeýden bas tartamyz. Iaǵni, ony bastamashy bolǵan organǵa qaitaramyz», – dedi ol.
Vedomstvo basshysy memlekettik tildegi nusqasynyń sapasyz bolýyna bailanysty keri qaitarylǵan zańdardyń statistikasy júrgizilmeitinin aitty.
«Zań jobalary tek bir tildegi mazmuny boiynsha ǵana emes, zańnamadaǵy ózge talaptarǵa sáikestigi boiynsha saraptalady. Sondyqtan naqty memlekettik tildegi mazmuny boiynsha statistika júrgizbeimiz», – dedi Azamat Esqaraev.
Sondai-aq ol Konstitýtsiianyń qazaq tilindegi nusqasy zań tiline sai dep esepteitinin aitty.
