Túrkistan oblysynda 3 milliard teńgeden astam biýdjet qarajatyn jymqyrdy dep aiyptalǵan uiymdasqan qylmystyq toptyń 27 múshesine sot úkimi shyqty, dep habarlaidy ult.kz.
Sot úkimine sáikes, sottalýshylardyń árqaisysyna qylmystaǵy róline qarai 6 jyldan 8 jylǵa deiin bas bostandyǵynan aiyrý jazasy taǵaiyndaldy.
Qarjylyq monitoring agenttiginiń Túrkistan oblysy boiynsha departamentiniń málimetinshe, 2016–2021 jyldar aralyǵynda «KT Iassy Nesie» JShS basshylyǵy «Agrarlyq nesie korporatsiiasy» AQ arqyly iri qara mal satyp alýǵa arnalǵan memlekettik qoldaý baǵdarlamasy aiasynda bólingen qarajatty jymqyrýdyń kúrdeli shemasyn uiymdastyrǵan.
Tergeý derekterine sáikes, nesie alý úshin jalǵan tulǵalardyń atyna sharýa qojalyqtary men jeke kásipkerler tirkelgen. Olardyń atynan qoldan jasalǵan biznes-josparlar, quqyq belgileitin qujattar jáne shyn máninde joq kepil múlki usynylǵan.
Sonymen qatar, nesie mamandary jalǵan qorytyndylar men tekserý aktilerin ázirlep, qarajattyń maqsatty paidalanylǵany týraly jalǵan qujattar rásimdeý arqyly nesielerdiń zańdy berilgendei kórinisin jasaǵan.
Baǵalaýshylar men kepil mamandary jalǵan baǵalaý esepterin daiyndap, is júzinde joq nemese naqty qunynan áldeqaida joǵary baǵalanǵan múlikti kepil retinde kórsetken. Al notariýstar syiaqy alyp, kepil múlkine qatysty jalǵan qujattardy kýálandyrǵan.
Tergeý barysynda 33 qylmystyq quqyq buzýshylyq faktisi anyqtaldy. Qylmystyq shema arqyly 24 jalǵan nesie rásimdelip, kepil retinde shyn máninde joq 54 nysan usynylǵan.
Sot sheshimimen memleket kirisine 19 turǵyn úi, 10 jer ýchaskesi, 2 páter, 4 kommertsiialyq nysan jáne 4 avtokólik tárkilendi.
Aita keteiik, sot úkimi ázirge zańdy kúshine engen joq.
