Qazaqstan Respýblikasy Eńbek kodeksiniń 113-babyna sáikes, jalaqyny aiyna keminde bir ret jáne kelesi aidyń birinshi onkúndiginen keshiktirilmei tólenýge tiis. Tólemniń naqty kúni eńbek nemese ujymdyq shartta belgilenedi. Eger belgilengen tólem kúni demalys ne mereke kúnine sáikes kelse, jalaqy odan burynǵy kúnderde tólenedi, dep habarlaidy ult.kz.
Jalaqy keshiktirilse, ne isteý kerek?
Aldymen jumysker jumys berýshige júginip, keshiktirý sebebin anyqtap, bereshekti óteýdi talap ete alady.
Másele sheshilmese, jumysker jumys berýshiniń turǵan jerindegi Qazaqstan Respýblikasy Eńbek jáne halyqty áleýmettik qorǵaý ministrligi Memlekettik eńbek inspektsiiasy komitetiniń aýmaqtyq departamentine júginýge quqyly. Ótinishti eOtinish júiesi arqyly elektrondyq formatta da jiberýge bolady.
Ótinishke eńbek qatynastaryn jáne jalaqy boiynsha bereshekti rastaityn qolda bar qujattardy qosa tapsyrý kerek. Ol jerde eńbek sharty, esep aiyrysý paraqtary, bank kóshirmeleri, buiryqtar jáne ózge de rastaityn materialdar bolýy múmkin.
Ótinish qaralǵannan keiin qandai is-sharalar júrgiziledi?
Qajet bolǵan jaǵdaida memlekettik eńbek inspektorlary zańnamada belgilengen tártippen baqylaý is-sharalaryn júrgizedi.
Bereshek faktisi rastalsa, jumys berýshige buzýshylyqty joiýǵa, onyń ishinde jalaqy boiynsha bereshekti óteýge mindetti oryndalýǵa tiis nusqama beriledi. Nusqamanyń oryndalýyn memlekettik eńbek inspektorlary baqylaýǵa alady.
Sonymen qatar jumys berýshi jumyskerge jalaqy bereshegin ǵana emes, keshiktirilgen árbir kúntizbelik kún úshin turaqsyzdyq aiybyn da tóleýge mindetti. Onyń mólsheri jalaqy tóleý mindettemesi oryndalǵan kúni qoldanysta bolǵan QR Ulttyq Banki bazalyq mólsherlemesiniń 1,25 eselengen mólsheri boiynsha esepteledi.
Jumys berýshige qandai jaýapkershilik kózdelgen?
Jalaqyny tolyq kólemde, belgilengen merzimde tólemegeni úshin, sondai-aq jumys berýshiniń kinásinen turaqsyzdyq aiybyn eseptemegeni jáne tólemegeni úshin Qazaqstan Respýblikasynyń Ákimshilik quqyq buzýshylyq týraly kodeksiniń 87-babynda ákimshilik jaýapkershilik kózdelgen.
Aiyppul mólsheri:
- laýazymdy adamdarǵa – 30 AEK;
- shaǵyn kásipkerlik sýbektilerine nemese kommertsiialyq emes uiymdarǵa – 60 AEK;
- orta kásipkerlik sýbektilerine – 100 AEK;
- iri kásipkerlik sýbektilerine – 150 AEK mólshetin quraidy.
Jalaqynyń keshiktirilýi jumyskerdiń eńbek quqyqtarynyń buzylýy bolyp tabylatynyn eske salamyz. Eger jumys berýshi jalaqyny belgilengen merzimde tólemese, jumysker zańnamada kózdelgen sharalardy qabyldap, óz quqyqtaryn qalpyna keltirý úshin memlekettik eńbek inspektsiiasy organdaryna júgine alady.
