Bala quqyqtary jónindegi ýákil Zaǵipa Balieva mektepte qandai pánderdi shet tilinde oqytý kerektigin oqýshylardyń ózderinen suraýdy usyndy. Bul týraly ol QR Din isteri jáne azamattyq qoǵam ministrliginiń janyndaǵy ÚEU-men ózara is-qimyl jónindegi úilestirý keńesiniń otyrysynda aitty, dep habarlaidy Sputnik Qazaqstan.
Balalar ombýdsmeni aǵylshyn tilinde sabaq berýdi qarapaiym pánderden bastaýdy usyndy. Sebebi fizika, himiia sekildi kúrdeli pánderdi aǵylshynsha oqý balalarǵa óte qiyn.
«Bala pándi ana tilinde áreń túsinip, 12%-ǵa ǵana meńgerse, onda ol aǵylshyn tilinde qalai oqidy? Onda onyń pándi igerý kórsetkishi budan da tómen degen sóz. Múmkin, balalarmen áńgimelesip, qandai pándi aǵylshyn tilinde oqytý kerektigin ózderinen suraý kerek shyǵar. Bala aǵylshynsha sóilep, maǵynasyn túsinip úirenýi kerek. Múmkin, ádebiet nemese qazaq ádebietin aǵylshyn tilinde bersek? Bálkim, sol kezde oqýshy ony túsinip, sol tilde sóileitin bolady. Al myna formýlalar, Om zańy oǵan ómirde túk te qajet emes. Biz tehnikalyq mamandardy az daiyndaimyz. Ári ketse 5 paiyz ǵana shyǵatyn shyǵar», — deidi Balieva.
Sondai-aq ombýdsmen taǵy bir mańyzdy problemany atap ótti. Onyń aitýynsha, sanitarlyq normalardan mektepke saý bop kelgen bala 11 jyl ishinde túrli aýrýǵa shaldyǵady. Al bilim jáne ǵylym ministrligi men densaýlyq saqtaý ministrligi bul máselege kóz jumyp qarap otyr.
"Mektepke deni saý bala keledi, al 11 synypqa qarai 72%-ynda kórý qabileti nasharlaǵan, 34 % – skolioz, 50 %-dan astamynda ishek-qaryn jolymen bailanysty problemalary bar. Bylaisha aitqanda, saý bala mektep bitirgende túrli «kásibi» aýrýǵa shaldyǵady, al biz sanitarlyq erejeler men normalardy qaita qarastyrǵymyz kelmeidi. Skolioz emdelmeidi», — dep túiindedi Balieva.
