«Z» urpaǵy - óte kedei, biraq eń tabysty urpaq. Bul týraly búgin Májilistegi Úkimet saǵatynda QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Ózderińizge belgili, QR Tuńǵysh Prezidenti – Elbasy Nursultan Nazarbaev 2019 jyldy Jastar jyly dep jariialady. Ondaǵy maqsat – jastarymyzǵa ózderin jetildirýine, tabysty damýyna jáne ál-aýqatyn nyǵaitýǵa múmkindik jasaý. Bul jerde eskeretin másele – aýqymy men mańyzy boiynsha Jastar jylyn tek 12 aiǵa eseptelgen is-sharalardyń kúntizbelik jospary dep qarastyrýǵa bolmaidy. Jastar saiasaty salasyndaǵy Úkimet júzege asyratyn keshendi bastamalar júieli, eń bastysy, uzaq merzimdi áleýmettik nátije týdyrýy tiis», - dedi ministr.
Onyń aitýynsha, negizgi is-sharalar 3 jylǵa eseptelgen. Al memlekettik qoldaýdyń eń tiimdi sharalary memlekettik jastar saiasatynyń on jyldyq Tujyrymdamasyna kiredi. Is-sharalardy josparlaý jáne júzege asyrý qazaqstandyq jastardyń negizgi demografiialyq sipattamalaryn eskere otyryp júrgizildi.
«Búginde Qazaqstanda úsh million segiz júz myńnan astam jastar bar. Bul jalpy halyq sanynyń 21 paiyzy. Jas ólshemi boiynsha 1 million 181 myń jas iývenaldyq topqa jatady – bul 14 jastan 18 jasqa deiingi adamdar. Postiývenaldy topqa – 19-dan 23 jasqa deiingi 1 million 160 myń azamat jatady. 24-29 jas aralyǵyndaǵy eresek top bir jarym million adamdy quraidy. Tutastai alǵanda, bul demografiialyq kórinis búkil álemde ártúrli jyldamdyqpen júrip jatqan urpaqaralyq tranzit protsesin jaqsy beineleidi. Bul jerde «Y» urpaǵy men «Z» urpaǵy arasyndaǵy shekarany anyqtaityn qundylyqtar men dúnietanymdyq sipattamalardyń aýysýy týraly sóz bolyp otyr. Jalpy bizdiń áleýmettik ólshemderimiz - «Z» urpaǵy, 1995 jyldan keiin týǵan jastar týraly jalpy qabyldanǵan uǵymdarmen úilesedi«,- dedi ministr.
Osy oraida Dáýren Abaev «Z» urpaǵyn sipattap berdi.
«Olar tsifrlyq qyzmetterdi joǵary deńgeide tutynady. Olardyń eńbekke, aqsha men bos ýaqytyn ótkizýge degen ustanymdary qalyptasqan dástúrli kózqarastardan ózgeshe. Mysaly, olar jumysty kóbine úide isteýge beiim, olar úshin jumys berýshiniń missiiasy men qundylyqtary úlken mańyzǵa ie, mundai jastarymyz mobildi jáne turǵylyqty jerin jii ózgertýge áýes. Sheteldik áleýmettanýshylardyń aitýynsha, absoliýttik mánde bul óte kedei, biraq eń tabysty urpaq. Aldyńǵy býynmen salystyrǵanda olardyń jyljymaityn múlki nemese kóligi joq, biraq yńǵaily apartamentterdi jalǵa alyp turýǵa múmkindikteri bar, Uber qosymshasyn paidalanady, al qarajatyn «qysyltaiań kezge» dep keiinge jinaýdyń ornyna, álemdi emin-erkin, eshqandai arnaiy týristik joldamasyz aralaýdy qalaidy«, - dedi Abaev.
