Búgin Astanadaǵy biznes-forýmda sóz sóilegen Estoniia Premer-Ministri Iýri Ratas Qazaqstanmen aradaǵy yntymaqtastyqtyń keleshegine toqtaldy. Sonymen qatar, ol Qazaqstan Úkimetiniń basshysy Baqytjan Saǵyntaevpen ekijaqty kezdesýdegi áńgimesin de erekshe atap ótti, dep habarlaidy QazAqparat tilshisi.
«Birinshiden, búgin Qazaqstan Premer-Ministrimen ekijaqty kezdesýim óte tiimdi ári jemisti bolǵanyn atap ótkim keledi. Biz Qazaqstan men Estoniia yntymaqtastyǵynyń túrli aspektilerin talqyladyq. Tsifrlandyrý, bilim berý men aýyl sharýashylyǵy týraly áńgimelestik. Sonymen qatar, Qazaqstan men Estoniia arasyndaǵy qarym-qatynastar baǵytyndaǵy «Bir beldeý, bir jol» bastamasy týraly da sóz qozǵadyq. Álbette, Estoniia bul bastamaǵa qatysýǵa qyzyǵýshylyq bildiredi, óitkeni bul eki eldi temirjoldar arqyly bailanystyrady», - dep atap ótti Iu. Ratas biznes-forým barysynda.
Onyń aitýynsha, Qazaqstan men Estoniianyń yntymaqtastyǵy keleshek qarym-qatynastar úshin de zor áleýetke ie.
«18 mln halqy bar Qazaqstan óte úlken el, munai ken oryndaryna da bai, mańyzdy saýda bailanystaryna da ie. Estoniia halyq sany az, shaǵyn memleket. Osyndai ártúrli aiyrmashylyqtarymyz bolǵanyna qaramastan, bizdiń ortaq múddelerimiz de barshylyq. Ekijaqty ekonomikalyq ózara bailanysty keńeitýge múmkindigimiz mol, bular ásirese IT, kólik, logistika, aýyl sharýashylyǵy jáne ekologiialyq tehnologiialar, qaldyqtardy basqarý salalarynda basymdyqqa ie dep oilaimyn. Bul baǵyttaǵy tizim ýaqyty kelgen saiyn keńeie túsedi degen senimdemin», - dedi Estoniianyń Úkimet basshysy.
Sóz arasynda mártebeli meiman Astana Hub-ty aralap kórgisi keletinin de jetkizdi.
«Men Qazaqstan Úkimetiniń jeke sektormen birlese otyryp meilinshe saralanǵan jáne zamanaýi ekonomikalyq model baǵytyn qalyptastyrýǵa qatysty úlken saiasi erik-jigerin baiqap otyrmyn. Bul rette ózgeristerdi tek ákelip qana qoimai, ony udaiy qoldaý qajettigin de túsinemin. Ekinshi jaǵynan Estoniia ekonomikasy da eńbekti kóp qajet etetin indýstriiadan kapitaldy qajet etetin indýstriiaǵa transformatsiialaý protsesinen ótip jatyr. Álbette bul dástúrli indýstriia quryp ketedi degen sóz emes, kerisinshe, bul olardyń tsifrlandyrýdy, avtomattandyrý men jańa tehnologiialardy qoldana otyryp burynǵydan da tiimdi bola túsetinin qarastyrady», - dedi Iu. Ratas.
Eske sala ketsek, búgin elordada Digital Bridge halyqaralyq innovatsiialyq forým ótip jatyr.
