Birikken Ulttar Uiymynyń Niý-Iorktegi keńsesiniń mańyna 2018 jyly áskeri qaqtyǵystar saldarynan bolǵan balalar óliminiń úlken aýqymyn kórsetetin installiatsiia jasaldy, dep habarlaidy "Ult aqparat" UNICEF baspasóz qyzmetine silteme jasap.
IýNISEF usynǵan installiatsiiada oqýshylarǵa arnalǵan 3 758 arqa qorjyny qulpytas túrinde usynylǵan. Qulpytas túrindegi balalar sómkeleri áskeri áreketter saldarynan búldirshinderdiń qyrshynnan qiylǵanyn kórsetedi.
«IýNISEF sómkeleri barlyq ýaqytta úmit pen balalyq shaqtyń simvoly bolǵan. Eki aptadan keiin álem kóshbasshylary Balalar quqyǵy týraly Konventsiianyń 30 jyldyǵyn atap ótý úshin BUU Bas assambleiasynyń kezekti sessiiasyna jinalady. Bul installiatsiia olarǵa basty dúnieni eske salýy kerek», - dedi atalmysh uiymnyń atqarýshy direktory Genrietta Fore.
Bas hatshynyń 2019 jylǵy balalar men qarýly qaqtyǵystar týraly jyl saiynǵy baiandamasyna sáikes, ótken jyly áskeri qaqtyǵystar bolǵan aimaqtarda 12 myńnan astam kóz jumdy nemese jaraqat aldy. Bul, Birikken Ulttar Uiymy osy aýyr jaǵdaidy baqylap, habar bere bastaǵannan bergi eń joǵarǵy kórsetkish. Bul tek anyqtalǵan jaǵdailar ǵana, shyn máninde atalǵan kórsetkish odan da kóp bolýy múmkin.
