Mádeniet jáne sport ministri Aqtoty Raiymqulova Abaidyń 175 jyldyǵyn atap ótýde ysyrapshyldyqqa jol berilmeitinin málimdedi, dep habarlaidy QazAqparat.
«Osy jyly biz halqymyzdyń kórnekti aqyny jáne oishyly Abai Qunanbaiulynyń mereitoiyn atap ótýdemiz. Abai filosofiiasy bizdiń mádeni jáne ulttyq biregeiligimizdiń ajyramas bóligine ainaldy. 21 qańtarda «Astana Opera» teatrynda Uly Abaidyń mereitoiyn resmi túrde ashý rásimi ótti. Prezidentimiz Qasym-Jomart Kemeluly Toqaevtyń «Abai jáne HHI ǵasyrdaǵy Qazaqstan» maqalasynda eń basty maqsat – toi toilaý emes, oi tolǵaý, oi órisimizdi keńeitý ekenine zor mán berip otyrǵanyn bilesizder. Bekitilgen jalpy respýblikalyq jospardyń barlyq is-sharalary ideologiialyq jáne aǵartýshylyq júktemeni kóteredi», - dedi Aqtoty Raiymqulova OKQ alańy arqyly onlain rejimde halyq aldynda esep berý kezdesýinde.
Ministr Memleket basshysy atap ótkendei, mereitoidyń kún tártibi tujyrymdamalyq turǵydan elde jáne shetelde Abai tulǵasynyń jahandyq aýqymyn keńinen tanymal etýge arnalǵan ideologiialyq-mazmundy jáne sapaly is-sharalardy ótkizýge negizdeletinin aityp ótti.
«Bul rette biyl atap ótiletin mańyzdy is-sharalar barysynda ysyrapshyldyq pen naýqanshyldyqqa jol berilmeitindigine basa nazar aýdarǵym keledi. Búgingi kúni Abaidyń murajai-úiinde, Jidebaidaǵy «Abai-Shákárim» memorialdyq kesheninde ǵylymi-restavratsiialaý jumystary júrgizilýde. Abaidyń «Jidebai-Bórili» mýzei-qoryǵyn tolyqqandy ǵylymi-zertteý ortalyǵy etip qaita qurý tujyrymdamasy ázirlendi. Jalpy, Shyǵys Qazaqstan oblysyndaǵy 18 nysanda jumystar júrgizilýde», - dedi ol.
Aqtoty Raiymqulova óz sózinde Abai shyǵarmashylyǵyn nasihattaý maqsatynda elde jáne shetelde onyń eńbekteri álemniń 8 shet tiline aýdarylyp, basylyp shyǵarylatynyn atap ótti.
«Pragada Abaidyń mádeni-aqparattyq ortalyǵy ashyldy. Bratislava, Býdapesht, Berlin qalalarynda «Abai oqýlary», kórmeler, dóńgelek ústelder uiymdastyryldy. Nur-Sultan qalasyndaǵy L.N. Gýmilev atyndaǵy Eýraziia ulttyq ýniversitetiniń bazasynda «Abai akademiiasy» ǵylymi-zertteý institýty quryldy. Mereitoidyń negizgi sharalaryn qyrkúiek aiynda Shyǵys Qazaqstan oblysynda ótkizý jospralanyp otyr. Qazan aiynda Parijdegi IýNESKO-nyń Shtab-páterinde Abai mereitoiynyń halyqaralyq tusaýkeseri ótedi», - dedi Aqtoty Raiymqulova.
