29 tamyzda Astanadaǵy №2 Esil aýdandyq sotynda Qazaqstan jýrnalister odaǵynyń tóraǵasy Seiitqazy Mataev jáne uly Áset Mataevtardyń qylmystyq isi boiynsha sottyń isti qaraýy jalǵasty. Olarǵa «alaiaqtyq jasady jáne salyqtan jaltardy» degen aiyptar taǵylyp otyr.
«Qazaqtelekom» AQ-na qatysty epizod boiynsha sotqa jaýap bergen «Qazaqtelekom» AQ-nyń buqaramen bailanys jónindegi qyzmetiniń burynǵy jetekshisi Iýliia Isakova B. Mahanbetajievtiń tikelei tapsyrmasy boiynsha «Ulttyq baspasóz klýbyna» tenderdi utqyzýǵa tapsyrma berilgenin áńgimelep berdi. «Buqaramen bailanys jónindegi qyzmetke tikelei jáne jalǵyz Batyr Mahanbetajiev basshylyq etti. 2011-2012 jyldary Mahanbetajiev maǵan tender ótkizýde «Ulttyq baspasóz klýbyna» barynsha basymdyq berip, utqyzýdy tapsyrdy. Sol sebepten men menedjerler Z. Qazybaeva men M. Ýálihanǵa kelisim-shartta baspa BAQ-tardyń prais-paraqshasyndaǵy baǵany emes, áleýetti jetkizýshi – «Ulttyq baspasóz klýbynyń» tenderlik qujattarynda kórsetilgen baǵany belgileýdi usyndym. Ondaǵy baǵa basqa baspa BAQ-dikinen joǵary bolatyn» dedi ol sot otyrysynda.
Buǵan qosa, Iu. Isakova S. Mataevtyń týysy ári kómekshisi, «Ulttyq baspasóz klýbynyń» ókili Erlan Ramazanovqa kómekteskenin jasyrmai aityp berdi. Ol kompaniia menedjerlerine «Ulttyq baspasóz klýbynyń» tenderdik qujattaryn jaqsylap qarap, jekelegen kemshilikterin joiýǵa tapsyrma berip otyrǵan. Sondai-aq, E. Ramazanovty tender ótpei turyp, tenderlik qujattarmen jáne «Qazaqtelekomnyń» biýdjetimen tanystyrǵan. Sonyń nátijesinde 2011-2012 jyldary tender ótkizilmegen bolyp sanalyp, sonyń nátijesinde ol Qazybaeva men Ýálihanǵa qaita tender ótkizbei-aq, «Ulttyq baspasóz klýbymen» «bir kózden» qarjylandyrýǵa kelisim-shart jasaýdy tapsyrady. Mundai norma memlekettik satyp alý tártibine qaishy kelmeitin edi.
Iu. Isakova da baspa BAQ-tarda jaryqqa shyqqan materialdarǵa tekserý júrgizbei-aq, «Ulttyq baspasóz klýby» jibergen atqarylǵan jumystar týraly aktilerge qolyn qoiǵan. Onyń nusqaýymen jumys istegen menedjerler kelisim-sharttar jasalmai turyp-aq, «Qazaqtelekomnyń» qyzmeti týraly materialdardy baspa BAQ-tarǵa ornalastyrǵan. Ol sot aldyndaǵy bergen jaýabynda B. Mahanbetajievtiń tapsyrmalaryn jumystan bosata ma degen qorqynyshpen oryndaǵanyn aitty.
Ámirlan Álimjan
